COVALIMA, 11 maiu 2023 (TATOLI)–Ministériu Solidariedade Sosiál no Inkluzasaun (MSSI) liuhosi Sentru Solidariedade Sosiál no Inkluzaun (SSSI), estabelese komisaun diretiva nivél munisipal atu kontrola implementasaun pagamentu programa bolsa da mãe jerasaun foun iha Covalima.
“Ita forma komisaun diretivu munisípiu ida-ne’e ho objetivu atu ajuda rezolve problema ne’ebé mosu durante prosesu implementasaun programa pagamentu bolsa da mãe jerasaun foun iha Covalima, liga liu kna’ar no responsabilidade liña setorál ne’ebé sei envolve iha prosesu ida-ne’e,” Diretór Nasionál Asisténsia Sosiál, Lucas Tois, hateten ba jornalista sira, iha salaun SSSI Covalima, Suai Loro, kinta ne’e.
Komisaun diretivu munisípiu envolve hosi Servisu Saúde munisipal, rejistu notariadu no autoridade munisípiu hotu inklui mós MSSI liuhosi sentru solidaridade sosiál munisípiu sei koordena no mós kanaliza informasaun nesesita desizaun grupu traballu nasionál komisaun diretiva bele rezolve iha nivél munisípiu.
Diretór Sentru Solidariedade Sosiál Inkluzaun Covalima, Agapito Asis esplika, estabelese komisaun haree polítika Governu implementa programa bolsa da mãe Jerasaun foun liuhosi komisaun hodi bele rezolve problema.
“Ohin, estabelese komisaun ida-ne’e atu haree servisu komisaun karik ita-nia komunidade enfrenta problema oinsá bele buka alternative,” nia hateten.
Komisaun diretiva oinsá halo enkontru avaliasaun haree implementasaun polítika Governu implementa programa hodi identifika problema halo koordenasaun ho instituisaun sira hodi buka alternativa rezolve problema bazeia kompeténsia.
Tuir dadus ne’ebé Agência Tatoli asesu hosi pontu fokál bolsa da mãe jerasaun foun iha Covalima rejista rekerente 4,911 ne’ebé asesu programa bolsa da mãe jerasaun foun ho totál númeru inan isin-rua 767, labarik ho idade 0-03 hamutuk 4,126, labarik ho moris defisiénsia na’in-18.
Bazeia ba baze legál Dekretu-Lei númeru 22/2021 ko’alia kona-ba kria subsídiu ba inan isin-rua no labarik sira-ne’ebé hanaran “Bolsa da Mãe Jerasaun foun” ne’ebé halo alterasaun ba dahuluk ba Dekretu-Lei númeru 18/2012 ,04 abríl.
Jornalista : Celestina Teles
Editór : Cancio Ximenes
