OÉ-CUSSE 09 fevereiru 2023 (TATOLI) –Ministériu Turizmu, Komérsiu no Indústria (MTKI) lansa kompetisaun negósiu inovativu iha Rejiaun Administrativa Espesiál Oé-Cusse Ambeno (RAEOA), hodi halo diversifikasaun ekonomia iha baze.
Programa ne’e Ministériu Turizmu, Komérsiu no Indústria (MTKI) serbisu hamutuk ho Programa Nasaun Unida ba Dezenvolvimentu (PNUD), Institutu Apoiu Dezenvolvimentu Emprezariál (IADE), KOICA no Autoridade RAEOA, kinta ne’e halo lansamentu kompetisaun negósiu inovativu da hahuluk iha Oé-Cusse, ho tema ‘Promove diversifikasaun ekonomia hosi baze’.
Objetivu hosi lansamentu kompetisaun negósiu inovativu da hahuluk iha Oé-Cusse, atu enkoraja foinsa’e produtivu no kreativu sira-ne’ebé, ho ideia negósiu inovativu hodi kria serbisu rasik, liuhosi fortalesimentu empreendedorizmu ho ekosistemia.
Diretór Nasionál Apoiu Dezenvolvimentu Mikro-Pequena no Médiu Empreza, Bernardino Manezes, hatete, objetivu hosi programa ne’e atu fó oportunidade no eleva foinsa’e sira esplora sira-nia poténsia iha área negósiu hodi kontribui ba kresimentu ekonómia Timor-Leste, liuhosi hasa’e númeru emprezáriu foinsa’e iha área mikro pequena médiu empreza.
“Programa ne’e kontinuasaun 2021 nian ho objetivu atu kontinua fó apoiu ba kapasitasaun no ekipamentu ba foinsa’e sira-ne’ebé mai ho ideia úniku diferensa no inovativu ba negósiu hirak-ne’ebé ho intensaun atu motiva joven sira investe iha setór produtivu, agrikultura, peska, komérsiu indústria no turízmu, orienta ba impaktu sosiál ho valór aas ekonomia rai laran kontribui rezolve problema komunidade,” Bernardino Manezes, ko’alia iha ámbitu lansamentu ne’e hala’o iha otél Ambeno Oé-Cusse.
Nia informa, iha 2021 MTKI hamutuk ho parsériu sira sira UNDP, KOICA no IADE implementa ona kompetisaun negósiu inovativu ba dahuluk no kontinua ba 2022 kompetisaun ba dalarua iha nivél nasionál, kontinua ba tinan ne’e MTKI koko atu implementa kompetisaun ne’e iha nivél rejionál, rejiaun leste, sentrál no oeste.
Nune’e, MTKI espera ho lansamentu ne’e joven no empreendedór sira iha RAEOA bele asesu informasaun bele aplika iha kompetisaun ne’e, atubele asesu ba apoiu ekipamentu atu dezenvolve sira-nia atividade negósiu no kria kampu serbisu rasik.
Prezidente Autoridade RAEOA, Arsénio Paixão Bano, afirma, desde RAEOA moris kada tinan autoridade serbisu hamutuk ho UNDP atu introdús programa inovativu hodi kapasita grupu joven feto no mane mai hosi suku sira.
“Ha’u hanoin esplikasaun lansamentu ohin ne’e, negosiasaun naruk tebes dezde tinan kotuk to’o tinan ne’e atu RAEOA mós bele hetan benefísiu hosi programa kompetisaun negósiu invativu ne’e, tán ne’e ohin emprezáriu, estudante autoridade komunitáriu, instituisaun sira hanesan SERVE no BNCTL, partisipa atu rona direita atividade ne’e, tanba inisiativa barak ita halo daudaun iha Oé-Cusse hanesan bisnis inkubatór,” nia katak.
Aliend ne’e mós autoridade apoiu fundu ba grupu Asosiasaun Feto Mudansa Ekonómia Família (AFMEF) atu promove inisiativa rasik ba atividade hotu-hotu, grupu projetu HAPAS fokuliu ba pekuáriu, nune’e ho kompetisaun ne’e importante grupu sira iha Oé-Cusse bele partisipa hodi hatudu talentu inovativu ho kualidade.
Entretantu, partisipa iha serimónia lansamentu ne’e mai hosi autoridade komunitáriu, xefe suku, estudante sira, setór privadu, SERVE, IP), Banku Nasionál Komérsiu Timor-Leste (BNCTL) no SEFOPE.
Jornalista: Abílio Elo Nini
Editór: Evaristo Soares Martins
