DÍLI, 10 Juñu 2026 (TATOLI) — Negosiante sira iha Merkadu Manleuana husu Governu atu alarga tan merkadu ne’e tanba kapasidade fatin atuál la sufisiente ona atu akomoda numeru negosiante ne’ebé kontinua aumenta.
Jestór Merkadu Manleuana, Elias Barros, hateten negosiante sira dala-barak levanta asuntu alargamentu merkadu bainhira hasoru difikuldade utilizasaun espasu negósiu iha merkadu ne’e.
“Negosiante sira husu atu Governu alarga tan Merkadu Manleuana tanba fatin ne’ebé iha agora la sufisiente ona atu sira halo negósiu,” dehan Elias Barros iha Merkadu Manleuana, ohin.
Tuir nia, dadaun ne’e negosiante na’in-992 mak halo atividade komersiál iha Merkadu Manleuana. Maski númeru negosiante aas, sira kontinua kolabora ho ekipa jestaun merkadu no kumpri regra sira-ne’ebé estabelese ona.
Regra prinsipál ne’ebé tenke kumpri husi negosiante sira mak mantén fatin negosiu moos, inklui soe foer iha lixu fatin, no respeita oras operasaun merkadu, hahu husi tuku 06:00 dadeer to’o tuku 07:00 kalan.
Merkadu Manleuana iha funsionáriu hamutuk na’in-10 ne’ebé loroloron halo monitorizasaun ba atividade komersiál sira atu asegura katak negosiante sira halo sira nia atividade tuir regulamentu ne’ebé vigora.
Entretantu, Ministériu Komérsiu no Indústria (MKI) lansa ona fatuk dahuluk ba konstrusaun foun Merkadu Manleuana. Maski obra fízika seidauk finaliza, maibe negosiante sira espera katak projetu ne’e bele aumenta kapasidade merkadu hodi akomoda númeru negosiante ne’ebé mak barak.
Iha parte seluk, ho aumentu numeru negosiante no kompetisaun ne’ebé kada vez sa’e makas kontribui ba hamenus rendimentu vendedór sira iha merkadu ne’e.
Porta-vóz negosiante Merkadu Manleuana, Octavio Lopes, hateten katak negosiante sira ne’ebé faan roupa-obralan enfrenta difikuldade tanba kompradór menus kompara ho tempu uluk.
“Ami preokupa tebes tanba roupa obralan ne’ebé ami faan iha Merkadu ne’e rendimentu menus. Situasaun ida-ne’e afeta tebes ba ami-nia rendimentu loroloron no moris família,” dehan Lopes.
Tuir nia, rendimentu mínimu ne’ebé negosiante sira bele hetan kada loron mak $5, enkuantu rendimentu másimu normalmente $20 de’it.
“Uluk, bainhira ema ne’ebé faan iha merkadu seidauk barak hanesan agora, iha loron Sabadu no Domingu ami bele hetan rendimentu husi $20 to’o $100. Maibé agora rendimentu tun tanba ema ne’ebé faan roupa obralan mos aumenta ona,” nia salienta.
Maski hasoru dezafiu sira relasiona ho limitasaun espasu no menus rendimentu, negosiante sira espera katak expansaun Merkadu Manleuana sei kria oportunidade ekonomia di’ak liután ba vendedór sira no komunidade tomak.
Jornalista: Camilio de Sousa
Editór: Filomeno Martins
