BOBONARU, 12 Juñu 2026 (TATOLI)-Ekipa téknika husi Diresaun Servisu Munisipál Obra Públika (DSMOP), Autoridade Munisípiu Bobonaru, halo levantamentu dadus kona-ba estrada rurál liga husi área Sibilaun, aldeia Soilesu, to’o mota Besimnahu Aibou, aldeia Ai-aras, suku Soilesu, postu administrativu Bobonaru, ho totál distansia kilómetru 7,5.
Levantamentu dadus ba estrada hanesan prosesu rekolla informasaun kona-ba kondisaun jerál no fasilidade. Objetivu prinsipál mak atu ajuda Governu halo planeamentu, jestaun, no desizaun ba konstrusaun ka reabilitasaun estrada ne’ebé seguru no efisiente ba públiku.
Vizita ne’e realiza atu halo observasaun direta ba kondisaun estrada no infraestrutura iha trosu ne’e, inklui identifika nesesidade sira ba melloramentu no manutensaun estrada atu fasilita asesu komunidade no apoiu dezenvolvimentu ekonomia lokál.
Durante atividade ne’e, ekipa tékniku rekolla informasaun importante kona-ba kondisaun rai, drenajen, no ponte ki’ik sira ne’ebé presiza konsiderasaun iha planu dezenvolvimentu infraestrutura futuru.
Notísia Relevante:Populasaun loke dalan foun 1,5km husi Soilesu bá Loubonu no Obulo
“Komunidade suku Soilesu fó apoiu tomak no partisipa ho diak durante prosesu levantamentu dadus ne’e, ho esperansa katak rezultadu iha tinan 2027. Parte kompotente bele tau prioridade ba kondisaun estrada, nune’e viajen bá fatin turizmu komunitáriu Bee-tudak Sibi la tahu ona”, Xefe suku Soilesu, Marito Victor da Costa, informa ba Tatoli.
Aldeia Aibou no Sibilaun, suku Soilesu, fronterar direita ho postu administrativu Atsabe, munisípiu Ermera.
Notísia relevante: Empreza Funan-Buras investe Saburaka 143 ba komunidade Soilesu
Jornalista: Sergio da Cruz
Editora: Maria Auxiliadora
