DILI, 02 Jullu 2025 (TATOLI)—Primeiru-Ministru Malázia, Anwar Ibrahim, halo ona ‘esforsu estra’ ida hodi promove Timor-Leste nia integrasaun ba membru plenu ASEAN iha fulan-Outubru mai ne’e.
Notísia Relevante: TL presiza dezenvolve polítika komprensivu seguransa nasionál antes sai membru plenu ASEAN
Liha hirak ne’e hato’o husi Vise-Prezidente Senadu Malázia Datuk Nur Jazlan bin Tan Sri Mohamed bainhira hasorumalu ho Prezidente Repúblika José Ramos Horta tersa, (01/07/2025).
“Apoiu Malázia nian ne’e tanba iha lasu kulturál no istóriku sira-ne’ebé kle’an hodi kesi nasaun rua ne’e,” Vise-Prezidente Senadu Malázia Datuk Nur Jazlan bin Tan Sri Mohamed, hateten hafoin hasoru malu ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite.
Prezidente Repúblika, José Ramos Horta simu Vise-Prezidente Senadu Malázia nian, Datuk Nur Jazlan bin Tan Sri Mohamed iha Palásiu Prezidensiál Nicolau Lobato, ne’ebé reafirma apoio firme husi Malázia ba adezaun tomak Timor-Leste nian ba ASEAN.
Prezidente Ramos Horta deskreve, nasaun rua ne’e hanesan parte ida husi “rumpun” espresaun ida-ne’ebé reprezenta família hanesan nasaun ida-nian, destaka katak definisaun kulturál no rejionál oferese fundasaun metin ida ba parseria estratéjika no ba progresu hamutuk rejiaun nian.
Durante diskusaun ne’ebé produtivu, Xefe Estadu hato’o ninia konfiansa boot ba kna’ar Timor-Leste nian iha futuru iha bloku nia laran.
Konfiansa ida-ne’e fahe husi Vise-Prezidente Senadu Malázia nian, ne’ebé afirma fiar katak Timor-Leste sei sai “parseiru di’ak iha ASEAN”, prontu atu kontribui ba objetivu no prospriedade komunidade rejionál nian hotu.
Notísia Relevante: Governu presiza hasa’e kapasitasaun rekursu umanu molok adere ba ASEAN
Jornalista : Hortencio Sanchez
Editór : Cancio Ximenes
