BOBONARO, 14 novembru 2023 (TATOLI) – Polísia Nasionál Timor-Leste (PNTL) Munisípiu Bobonaro junta ho Unidade Batallaun Orden Públika, Unidade Patrullamentu Fronteira no FALINTIL-Forsa Defeza Timor-Leste (F-FDTL) destakamentu postu Tunubibi, preparadu asegura eventu interkámbiu festivál kulturál fronteira.
Asuntu ne’e relata hosi Komandante PNTL Munisípiu Bobonaro, Superintedente Xefi António de Sá, hafoin halo enkontru ho Komandante Destakamentu Postu (F-FDTL) Tunubibi, Primeiru Sarjentu Vicente Freitas, Komandante Batallaun Orden Públika, Kompañia Delta Soso Maliana no Komandante Unidade Patrullamentu Fronteira (UPF) Tunubibi, kona-bá preparasaun seguransa hodi asegura eventu festivál ne’e.
Notisia relevante: PNTL Bobonaro husu komunidade mantein páz iha loron finadu
“Planu opersaun ita trasa tiha ona, tanba ne’e mak ohin konsolidasaun forsa rua iha-ne’e, atu komandu bele esplika ba komandante sira, oinsá konkretiza iha terrenu, tanba kestaun seguransa ne’e sensitivu, entaun ita preparadu atubele asesu eventu ne’e to’o nia rohan,” nia informa ba jornalista sira iha Maliana.
Superintedente Xefe António de Sá apela ba komunidade liuliu joven sira atu koopera ho parte autoridade seguransa no defeza hodi kria pás no estabilidade perante eventu ne’e to’o finaliza.
Tuir nia, Governu Sentrál deside realiza eventu ne’e iha Maliana, hanesan orgullu boot ba komunidade munisípiu Bobonaro, tanba ne’e atividade nível internasionál ne’ebe partisipa másimu konvidadu no bainaka importante sira hosi nasaun viziñu Nusa Tenggara Timur (NTT), Indonézia.
“Ita hotu-hotu tenke iha sentimentu pertense ba eventu ne’e, tanba ne’e hotu-hotu tenke kontribui pás no hakmatek, núne’e eventu ne’e la’o ho susesu, ne’e fila-fali ba ita Bobonaro nia-oan, entaun ita tenke hatudu ba munisípiu seluk katak Bobonaro ne’e bele,” Komandante ne’e fó hanoin.
Enkuantu festivál fronteira 2023 ne’e nuudar instrumentu ba pás ho objetivu atu hametin lasu amizade entre timoroan sira-ne’ebé fahe malu tanba konflitu pasadu iha tinan 1974 hakotu iha 1999 no hametin lasu amizade entre nasaun rua.
Festivál fornteira hanesan projetu promosaun ba dame, fraternidade umana, valoriza diversidade no pluraridade kultura entre Timor-Leste ho Indonézia, promove konetividade no empodera komunidade ka sosiedade sira liuhosi aspeitu kulturál no istoria ne’ebé refleta no inspira interasaun sosiál bazeia ba prinsípiu respeita direitu umanu, toleránsia no solidariedade umana no harii hikas kulturá dame ne’ebé nia abut mai hosi fiar, matenek lokál, tradisaun, kultura, no arte ne’ebé kontribui ba respeita valór umana.
Eventu ne’e sai nuudar plataforma múzika sira, grupu ba komunidade teatru, kuradór sira, eskritór, fotografer, jornalista, peskizadór no estudante sira iha Timor-Leste no Indonézia no mos sai prosesu interkámbiu kulturál hodi hamosu kompreensaun mútua, valoriza istória no diversidade kultura.
Festival Fronteira 2023,rekonsiliasaun no Interkambiu kulturál ho Objetivu atu enkoraja jerasaun Foun Timoroan hosi Timor-Leste no Timoroan sira iha Indonézia hodi hanoin kritiku ho topiku sira ne’ebé relasiona ho memoria komflitu Politiku sira iha pasadu,fraternidade umana,rekonsiliasaun no interkulturalidade iha Rejiaun espesifikamente iha área Fronteira Timor-Leste no Indonézia.
Promove kultura diálogu entre jerasaun foun sira iha Timor-Leste no Indonézia liuhosi produsaun konjunta ba konteúdu sira iha istória no kultura liuhosi obra no arte literatura.
Nune’e mós promove interkámbiu sai espasu ba kolaborasaun konjunta entre nasaun rua hodi kontribui ba balansu narativu istória.
Jornalista: Sérgio da Cruz
Editór: Evaristo Soares Martins
