OÉ-CUSSE, 06 jullu 2022 (TATOLI) – Dadus benefisiáriu idozu no invalidés iha Deprtamentu Ministériu Solidariedade Sosiál no Inkluzaun (MSSI), Rejiaun Administrativa Espesiál Oé-Cusse Ambeno (RAEOA) hamutuk 6.811 no kaléndariu pagamentu sei hahú uluk hosi suku Nipani, sub-rejiaun Pante Makasar.
Xefe Departamentu MSSI-RAEOA, Adelino Cau, esplika, benefisiáriu idozu-invalidéz iha RAEOA hamutuk 6.811, idozu 6.699 no invalidés hamutuk 112.
Daudaun ne’e ekipa tékniku sira distribui ona kaléndariu pagamentu iha sede suku sira, autoridade komunitáriu no Polísia Nasionál Timor Leste (PNTL).
“Pagamentu sei hahú aban loron 07 jullu, ne’ebé ita-nia preparasaun naran ba lista sira entrega ona iha sede suku no xefe suku no aldeia sira, atu mobiliza benefisiáriu sira konsentra hotu iha sede suku, tanba kalendáriu ne’e kompleta kedas ho data pagamentu, ne’ebé ita sei hahú uluk iha Pante Makasar, suku Nipani no ensera iha suku Suni-Ufe, sub-rejiaun Nítibe,” Adelinu Cau, ko’ali iha Oé-Cusse, kuarta ne’e.
Nia informa, mekanizmu pagamentu nian hanesan ho tinan kotuk sira-ne’ebé labele la’o banku BNCTL ho ofisiál tékniku hosi MSSI sei to’o nia hela fatin atu hetan nia direitu.
Purtantu prosesu pagamentu faze dahuluk nian sei hahú iha sub-rejiaun Pante Makasar ba benefisiáriu 3.227, mai hosi suku ualu, sei hahú pagamentu iha loron kinta 07 fulan-jullu iha suku Nipani ba benefisiáriu hamutuk 133, kontinua ba suku Costa iha kinta 08 to’o 12 jullu ba benefisiáriu 677, no iha loron 13 to’o 14 iha suku Lifau ba benefisiáriu 254.
Kontinua iha loron 15 to’o 19 fulan-jullu sei halo fali pagamentu ba benefisiáriu 701 iha suku Taiboko, loron 20 to’o 21 fulan-juulu pagamentu iha suku Lalisuk ba benefisiáriu 257, loron 22 to’o 26 jullu iha suku Cunha ba benefisiáriu 587.
Iha loron 27 fulan-jullu iha suku Bobokase ba benefisiáriu 190, no ensera pagamentu Pante Makasar iha suku Naimeko iha loron 28 fulan-jullu ba benefisiáriu hamutuk 428.
Kontinuasaun pagamentu iha sub-rejiaun Oésilo ba benefisiáriu 1.461 mai hosi suku 3, sei hahú hosi suku Bobometo loron 01 to’o 05 agostu ba benefisiáriu, iha loron 08 to’o 09 iha suku Usitasa’e ba benefisiáriu 542 no ikus iha suku Usitaqueno iha loron 11 to’o 12 ba benefisiáriu 112.
Tuir mai iha sub-rejiaun Pássabe totál benefisiáriu hamutuk 791 mai hosi suku 2, sei hahú uluk hosi suku Malelat iha loron 15 to’o 16, ba benefisiáriu 180, ikus iha suku Abani iha loron 17 to’o 19 ba benefisiáriu 611.
Pagamentu ikus nian ensera iha sub-rejiaun Nítibe ba benefisiáriu hamutuk 1.332 mai hosi suku lima, sei hahú uluk hosi suku Ban-Afi iha loron 22 to’o 23 ba benefisiáriu 236, iha suku Lela-Ufe iha loron 24 to’o 25 ba benefisiáriu 347, kontinua ba suku Usitako iha loron 26 to’o 29 ba benefisiáriu 352.
Nune’e mós iha loron 01 to’o 02 setembru kontinua halo pagamentu iha suku Bene-Ufe ba benefisiáriu 224 no ensera iha suku Suni-Ufe iha loron 05 setembru ba benefisiáriu 173.
Jornalista : Abílio Elo Nini
Editór : Evaristo Soares Martins
