BAUCAU, 08 outubru 2023 (TATOLI) – Konsellu Munisipál Kombantente Libertasaun Nasionál (CMCLN, sigla portugés) Baucau husu joven sira atu kontribui ba pás no estabilidade bainhira selebra loron nasionál juventude iha munisípiu Baucau.
Sekretáriu Jerál CMCLN Baucau, Manuel ‘Alari’ da Costa Soares, esplika, uluk juventude loriku as’wain ne’ebé fó aan mate iha loron masakre Santa Cruz, 12 novembru 1991 nu’udar aktu kontribusaun hodi luta ba liberta Timor-Leste hosi ukun Indonézia nian.
“Joven hotu-hotu tenke foku iha karreira estuda, situasaun atuál joven sees ona hosi misaun importante ne’e, ami husu ba joven sira atu hateke ba kotuk kona-ba prosesu luta ba ukun rasik aan,” Sekretáriu Jerál CMCLN hateten iha Vila Antiga, kuarta ne’e.
CMCLN prontu hamriik iha oin hamutuk ho juventude iha Baucau hanesan pontu tolu importante hanesan joven sira presiza tenke hatene prosesu kontribuisaun juventude ba ukun rasik-aan, matenek katak prepara aan estuda hodi kontinua kontribui ba dezenvolvimentu no hatudu responsabilidade katak presiza hatudu maturidade iha pensamentu.
Alari husu juventude atúal atu fo tempu aprende liuhosi asesu ba edukasaun liuliu hamutuk kria asaun konkretu hanesan hakribi violénsia nune’e Timor-Leste iha situasaun pás no dame tanba dezenvolvimentu presiza estabilidade.
Loron-12 novembru sai loron nasionál juventude tanba tempu ne’ebá joven barak hamriik iha liña oin hodi sosa independénsia tanba ne’e joven atuál tenke banati tuir hahalok ne’e atu kontinua luta dezenvolvimentu ba nasaun.
“Uluk tenke luta juventude sai pioñeiru iha oin maibé agora sai fali obstákulu ba dezenvolvimentu, ida-ne’e ba ami triste,” Alari akresenta.
Hosi perspetiva CMCLN Baucau mosu konflitu entre joven sira tanba líder arte-marsiál no rituál laiha responsabilidade ba membru sira tanba abandona hodi halo pertubasaun orden públiku nune’e halo situasaun sai ladi’ak.
Bainhira líder organizasaun arte-marsiál no rituál kontrola ona membru sira situsasaun iha teritóriu nasionál espesiál munisípiu Baucau sei hakmatek no prosesu dezenvolvimentu sei avansadu.
CMCLN konsidera selebrasaun loron nasionál juventude ba dala-32 juventude iha ona faze foun katak kapasidade intelektuál adultu ona tanba ne’e juventude hotu hamutuk halo reflesaun liuliu lembra prosesu rezisténsia nune’e kaer liman hamutuk kria pás no dame iha rai Timor-Leste espesiál munisípiu Baucau.
Jornalista : Natalino Belo
Editór : Evaristo Soares Martins
