BOBONARO, 18 janeiru 2024 (TATOLI)-Hahú hosi loron 03 fulan-janeiru tinan 2024 ne’e to’o agora Servisu Administrasaun iha suku Holsa, postu administrativu Maliana, munisípiu Bobonaro, ladún funsiona ho másimu hodi halo atendimentu ba komunidade sira-ne’ebé presiza.
Xefe suku Holsa, António Santa Cruz, hateten, situasaun ne’e akontese ligadu ho Pesoál Apoia Administrasaun Suku (PAAS) ne’ebé termina ona sira-nia kontratu servisu ho governu iha loron 31 fulan dezembru 2023.
Notísia relevante: Kontratu ba PAAS 452 termina iha 31 dezembru
“Haree iha suku la’o, maibé atendimentu administrasaun mak ladún másimu, kada vez xefe suku okupadu ho servisu seluk, ne’ebé mak tenke husik hela edifísiu, ba enkontru ka ba haree neseidade ka preukupasaun povu iha aldeia, entaun edifísiu ne’e, oras ida ka rua bele mamuk, tanba laiha pesoál ne’ebé atu halo atendimentu ba komunidade,” nia imforma ba jornalista sira iha Holsa, kinta ne’e.
Santa Cruz fundamenta, ho problema ne’e obrigatóriu xefe suku tenke asume reponsablidade hodi halo atendimentu ba komunidade ne’ebé atu trata deklarasaun suku, fixa família prenximentu livru suku 14 no rejistu Sistema Integradu Imformasaun Jestaun Dadus Suku no Aldeia (SIIGDSA).
“Ida-ne’e prezudika tebes ami-nia servisu, maibé iha-ne’e hahú 05 janeiru ne’e ha’u-nia xefe aldeia sira no juventude feto no mane mai ativu dadeer to’o meodia hodi apoia servisu ba atendimentu komunidade, tanba xefe aldeia balu hatene sistema, sira mai rejistu, maibé servisu balu sira la hatene, tenke hein ha’u mai mak foin halo, ne’e mak ha’u dehan ladún másimu,” nia informa.
Ligadu hos kestaun refere, komunidade Holsa, Domingas de Jesus, husu Ministériu Administrasaun Estatál atu aselera prosesu rekrutamentu ba Sekretária Suku, Pesoál Finana, Administrasaun no Pesoál Apoia Asuntu Sosiál hodi kompleta estrtutrua suku.
“Ha’u-nia hanoin tuir loloos atu hapara PAAS iha 31 antes ne’e loke ona vaga, atu PAAS sai ema foun troka kedas, agora ida hanesan administrasaun suku labele la’o duni, ami povu ba atu trata dokumentu lalais mos ladi’ak, xefe suku mesak de’it,” nia katak.
Enkauntu tuir dadaus komunidade iha suku Holsa hamutuk 7,967, komposta hosi mane 3,929, feto 4,038 hosi totál xefe fámilia 1,302, mai hosi aldeia Solugolu, Bilicou, Oplegul, Lolo’a, Taz no Secar.
Notísia relevante: MAE kapasita PAAS 50 iha Bobonaro utiliza programa SIIGDSA
Jornalista: Sérgio da Cruz
Editór: Evaristo Soares Martins
