VIQUEQUE, 16 jullu 2022 (TATOLI)–Sub-Komisaun Regularidade Arte Marsiais (sub-KRAM) munisípiu Viqueque koninua halo diseminasaun daruak ba grupu arte marsiál no grupu arte rituál sira iha munisípiu Viqueque kona-ba Governu atu reativa grupua arte marsiál IKS, PSHT no KORK.
Notísia Relevante: Governu ofisialmente halo reabertura ezersísiu arte-marsiál tolu iha Timor-Leste
Prezidenti sub KRAM munisípiu Viqueque, Cosme Sarmento, hateten diseminasaun daruak ne’e kona-ba dekretu-lei númeru 05/2017 ne’ebé mak provizoriu taka organizasaun tolu hanesan IKS, PSHT no KORK no arte rituál 77, maibé Governu inisiativa atu loke fila-fali arte marsiál no arte rituál ne’ebé Governu taka.
“Maibé ho estudu oioin ita-nia na’in-ulun sira tau hanoin hamutuk deside organizasaun sira-ne’e re-atvia tanba organizasaun sira-ne’e nu’udar instrumentu nasaun ninian. Ho ida-ne’e atu re-ativa tenke liuhosi prosesu lubuk ida ho kritériu ne’ebé mak iha,” Cosme Sarmento hateten ba Agência Tatoli, iha salaun munisípiu Viqueque, sábadu ne’e.
Tanba ne’e, nia dehan, diseminasaun segundu diretiva ne’e halibur arte marsiál no arte rituál sira iha munisípiu Viqueque hodi prepara re-abertura organizasaun tolu no rituál ida-ne’ebé durante ne’e paradu, nune’e fó fali dalan ba organizasaun sira hala’o sira nia atividade.
“Diseminasaun segundu diretiva ne’e sai importante tebes ba ita iha sorumutu ida-ne’e atu lori relatóriu ba Sekretariu Estadu Juventude no Desportu (SEJD) no KRAM atu mai re-abertura iha ita-nia munisípiu Viqueque. Ha’u mós distribui ona lista ba treinadór, lista ba formandu no lista ba fatin nian hodi organizasaun sira bele prenxe hotu bainhira SEJD mai halo re-abertura hotu, lista hirak ne’e entrega fila fali ba sub-KRAM Viqueque atu ami bele hatene,” nia dehan.
Reprezentante Komadante Polísia Nasionál Timor-Leste (PNTL) munisípiu Viqueque, Venseslau Moreira de Oliveira Freitas, hateten PNTL ninia papel mak atu asegura komunidade nia ativdade sira hotu iha munisípiu Viqueque, ho nune’e diseminasaun segundu diretiva PNTL nafatin husu organizasaun sira hotu kria pás no establidade iha munisípiu Viqueque.
“Ita mak nu’udar Viqueque ninia oan oinsá mak ita hamutuk hodi foti Viqueque ne’e ba oin. Maske arte marsiál no arte rituál xave mak unidade, nune’e labele sai muturabu. Liuhosi diseminasaun ne’e atu fó hanoin ba ita koordenadór arte marsiál sira fó hanoin ba membru hotu-hotu tenke tuir lala’ok sira-ne’ebé maka iha. Ita hatene Gvernu koko atu loke fila-fali organizasaun sira-ne’ebé durante ne’e taka,” nia dehan.
Organizasaun arte marsiál sira-ne’ebé eziste iha munisípiu Viqueque, maske organizasaun keta-ketak maibé tenke iha prinsípiu ida hodi fó liman ba malu dezenvolve munisípiu Viqueque.
“Ho organizasaun sira-nia prezensa mak bele hametin unidade. Tan ne’e, lori komandu PNTL Viqueque husu organizasaun sira hotu ita hamutuk hodi servi munisípiu Viqueque,” Atual komadante eskuadra PNTL postu Viqueque Vila ne’e hateten.
Nia relata, durante ne’e kazu ruma akontese iha Viqueqeu koordenadór organizasaun tolu no arte rituál ida sempre halo kolaborasaun ho PNTL no husu mantein nafatin kolaborasaun atu hametin seguransa.
Entretantu diseminasaun segundu diretiva ne’e hala’o durante loron ida hosi ekipa sub-KRAM munisípiu Viqueque no partisipa hosi koodenadór organizasaun arte marsiál tolu no arte rituáll inklui membru sira ne’ebé eziste iha Viqueque hamutuk na’in-200 resin.
Jornalista : Vitorino Lopes da Costa
Editór : Cancio Ximenes
