DILI, (TATOLI) – Governu liuhosi Ministériu Administrasaun Estatál (MAE) husu ba sidadaun hotu atu halo limpeza jerál hodi selebra tinan 15 restaurasaun independénsia no tomada pose ba Prezidente Eleitu, Francisco Guterres Lú-Olo.
“Primeiru Ministru, Rui Maria de Araújo ohin fó lia-menon ba ha’u atu aviza ba Administradór Munisípiu hotu liu-liu Administradór Munisípiu Dili hodi organiza komunidade sira halo limpeza jerál tanba bainaka sira hosi rai liur mós prezensa iha selebrasaun istórika”, Vise Ministru, Tomas Cabral ba Ajensia Tatoli, ohin iha Estatál Kaikoli.
Tuir nia, iha 18 maiu, Administradór Munisípiu Dili hahú mobiliza populasaun, estudante, sosiedade sivíl, Polísia Nasionál Timor-Leste (PNTL), Forsa Defeza Timor-Leste (F-FDTL) atu halo limpeza.
“Ema hotu tenke hamoos uma oin, valeta hodi hili lixu atu tau nia fatin hodi ekipa SAS bele halo rekollamentu, enkuantu Ajénsia Nasionál Dezenvolvimentu koopera ho PNTL atu organiza terminál iha Tasi-Tolu atu limpeza iha área ne’eba”, hateten nia.
Administradór sira tenke iha inisiativa hodi organiza tanba governu sentrál fó hotu orsamentu ba sira atu halo jestaun, tanba sira reprezenta governu sentrál iha munisípiu.
Iha munisípiu 12 orienta ona Administradór sira, 20 maiu organiza serimónia iha ida-idak nia rezidénsia no administrasaun.
Jornalista: Zezito Silva
Editora: Rita Almeida
