DILI, (TATOLI) – Institutu Petróliu no Geolojia (IPG) sei kolabora ho Universidade Southhern California no Universidade Nasionál Austrália hodi estabelese GPS permanente ida atu monitoriza rai-nakdoko iha Timor-Leste.
Estasaun GPS permanente ne’e la’os suporta de’it estudu geodinámiku sira maibé halo mós perkiza iha terenu geodesia, GIS, no mapeamentu.
Tuir komunikadu ne’ebé Ajénsia Tatoli asesu, estabelesimentu GPS sei realiza iha 17 to’o 18 maiu 2017 iha munisípiu Bobonaro.
Treinamentu kona-ba oinsá atu utiliza, análiza no halo intrepretasaun ba dadus GPS, sei realiza entre 19 to’o 24 maiu 2017 iha eskritóriu IPG, Aimutin, Komoro.
Formasaun ne’e sei realiza husi Professor Simon McClusky e Acraf Kuolali husi Universidadade Nasionál Austrália.
“Lori Insttituisaun nia naran ha’u agredese ba Universidade Southhern California, espesialmente Professora Meghan S. Miller no nia kolega sira iha departementu Geosiénsia, ba nia apóiu no doasaun matéria rua geodésoku GPS no Universidade Nasionál Austrália ba apóiu esperiensia no fortalesimentu kapasidade téknika ba IPG, análize no intrepretasaun dadus GPS”, tenik Prezidente IPG, Helio Guterres.
Nia dehan tan, IPG sei halo esforsu ida atu masimiza aplikasaun husi doasaun GPS ba estudu movimentu no identifika strutura geolojia iha Timor-Leste atu hadia peskiza instituisaun geolójika iha Timor-Leste.
Estudu no identifikasaun bele kontribui ba dezenvolvimentu, partikularmente planejamentu infrastrutura Timor-Leste.
Jornalista: Julia Chatarina
Editora: Rita Almeida
