DILI, (TATOLI) – Associação dos Ex-Prisionerios Políticos (AEP) no Klibur Solidariedade Timor-Leste (KSTL) fó parabéns no solidariedade ba prizioneiru polítiku Palestina tanba liu-husi greve han koletivu durante loron 40 hodi manán atinje pursentu 80 husi ezijénsia sira-nian ba direitu umanu báziku.
“Ami selebra prizioneiru polítiku sira-nia asaun koletiva ne’ebé hatudu barani no aten-barani; Ami selebra imi-nia manán”, haktuir komunikadu ne’ebé diriji mai redasaun Tatoli, ohin.
Sira mós deklara solidariedade no bolu atensaun ba prizioneriu palestinianu sira-nia luta ba liberdade, igualdade, autodeterminasaun no direitus umanus ne’ebé povu palestina buka durante tinan barak ona.
“Ami-nia istória nasionál hanorin katak bainhira ema hasoru okupasaun, esplorasaun no injustisa, tenke reziste, “resistir e vencer”, refere komunikadu.
AEP-KSTL haktuir eis-prizioneiru polítiku, dadur husi Indonézia tanba la simu de’it okupasaun ilegál iha Timor-Leste.
Durante okupasaun Indonézia, hasoru violénsia militár no abuzu direitu umanu, hasoru orden internasionál ida-ne’ebé orientadu ba interese kompañia Estadus Unidus Amérika no militerizmu.
“Ami defende ema nia dignidade e ami nian, ami-nia familia no komunidade nian. Ami defende ami-nia vizaun ba dame no justisa, agora no futuru”, akresenta.
Tanba ne’e, AEP-KSTL enkoraja prizioneiru polítiku sira no hato’o katak dala barak, luta ba objetivu ne’ebé nakonu domin ezije halo sakrifísiu ho determinasaun.
Tenke fiar katak lia-loos sei manán no sei habelar felisidade ba ema barak. Sakrifísiu hotu sei hetan rekoñesimentu; “tudo vale a pena”.
“Ohin-loron, ami selebra ho imi no ami mós hasoru violasaun direitu umanu ema Palestina nian husi Estadu Israel. Tuir ONG Klube Prizioneiru Palestina, iha prizioneiru polítiku palestinianu na’in-6,500 ne’ebé inklui labarik na’in-300”.
Hodi reforsa, hasoru violasaun sistemátika ida-ne’e, nomós hasoru papél Estadus Unidus Amérika ho ninia suporta maka’as ba militerizmu no okupasaun.
“Ami defende direitu umanu báziku ema Palestina nian, inklui direitu ba bee moos, uma, ai-han no servisu sosiál báziku sira no igualdade iha lei nia oin”, defende.
Atu konklui, AEP-KSTL sujere ba prizioneriu polítiku palestinianu sira, feto ka mane atu luta nafatin.
Jornalista: Rafy Belo
Editora: Rita Almeida
