DILI (TATOLI)-Ofisiál rekursu umanu HEINEKEN, Rita Maria Cairo Alves informa katak HEINEKEN lori uluk programa “Go Places” mai iha Universidade Nasionál Timor-Lorosa’e (UNTL) tanba konsidera universidade ne´e nu´udar ensinu superiór ida ne´ebé iha kualidade.
“Ami haree estudante UNTL sai hanesan eskola ho kualidade di´ak iha Timor-Leste tanba ida ne´e mak ami hili sai hanesan parseiru ida hodi hato´o ami-nia programa,” ofisiál HEINEKEN Rita Maria Cairo Alves informa perante akadémiku no media sira iha kampus Liseu, Fakuldade Edukasaun Arte no Umanidade (FEAU), UNTL, Dili.
Empreza Internasionál HEINEKEN tinan-tinan oferese programa APGP (Asian Pacific Graduate Program) hodi fó oportunidade ba nasaun sira iha Ázia Pasífiku hodi hasa´e kualidade estudante no foin sa’e sira.
Tinan ida ne´e, Timor-Leste (TL) hetan oportunidade ida ne´e liuhusi programa “Go Places” no realiza iha Universidade Nasionál Timor Lorosa´e (UNTL) namoos sei hala´o tan ba fatin seluk.
Programa ne´e foka liu ba estudante graduadu no finalista. Ba sira graduadu, tenke iha esperiénsia menus liuhusi tinan rua namoos bele ko´alia inglés tanba programa ida ne´e sira sei hetan treinamentu tolu.
Sei hala´o durante fulan 24 nia laran, kada fulan walu sei hala´o iha Timor-Leste, depois fulan walu hotu, sira sei ba fali nasaun Ázia Pasífiku seluk depende ba pozisaun no departamentu ne´ebé mak nasaun seluk presiza.
Oportunidade ida di´ak tebes ba estudante no foin sa’e sira atu konkorre tanba la´ós de´it atu ba aprende maibé prepara aan atu iha kualidade no kapasidade hodi hatudu katak ita bele hasoru ema ho nivel oioin.
Ne´e duni presiza tebes ko´alia inglés, atitude ne´ebé di´ak, iha kapasidade atu bele aprende lalais atu nune´e bele hasoru malu ho ema husi nasaun seluk.
Oportunidade ida ne´e la´ós mesak ba UNTL maibé ba timoroan tomak, joven se de´it mak finalista no graduadu husi universidade konkorre tanba objetivu hosi programa ne’e mak atu hasa´e kualidade joven Timor-Leste nian hodi hatudu ba mundu tomak katak ita mós bele.
Sai hanesan oportunidade mai ita atu lori ita-nia aan liuhusi kompañia sira ba mundu seluk. Nune´e, joven sira sei iha kualidade.
Dekanu Fakuldade Ekonomia no Jestaun (FEJ), Fernando Baptista Anuno informa katak FEJ liuhusi pro-reitór asuntu estudantíl, hato´o ona proposta ba HEINEKEN no HEINEKEN aseita hodi bele asina hamutuk MoU (Memorandum of Understanding) nune´e bele serbisu hamutuk no hametin liután relasaun amizade.
Nune´e fasilita mós estudante finalista sira ba estájiu iha empreza ne´e hodi bele atinje kualidade ensinu no hasa´e kapasidade estudante sira nian, bainhira remata estudu bele responde duni ba merkadu traballu.
“Ha´u ko´alia tiha ona ho diretór HEINEKEN iha departamentu rekursu umanu kona-ba proposta estudante finalista sira ba halo estájiu nune´e HEINEKEN mós bele kumprende kapasidade estudante. Proposta HEINEKEN simu no FEJ sei hato´o karta ba nune´e sira bele haruka fali karta mai hodi bele simu fali estudante hira. Dalan di´ak liu mak asina MoU,” informa tan dekanu ne´e.
Nia akresenta, FEJ aprende hela marketing, jestaun operasionál, nune´e bele fahe matenek ho parte prátika.
Prátika ne´e mak ho prezensa husi indústria sira mai hamutuk ho fakuldade no universidade atu nune´e bele iha kooperasaun di´ak, nune´e bele integra ba prosesu dezenvolvimentu.
Tanba, diversikasaun ekonomia la depende lós ba presu mina no gás maibé oinsá atividade indústria sira atu bele responde ita-nia nesesidade ekonómika namoos kontribuisaun ba nasaun liuliu kontribuisaun impostu, rendimentu nomós kontribuisaun serbisu hamenus dezempregu.
Dekanu ne´e reforsa mós katak ho lansamentu programa “Go Places” husi HEINEKEN bele loke mós Timor-Leste ba iha mundu internasionál.
“Ideia ne´e kapas, atu sira bele rekruta ita-nia estudante sira ne´ebé ho kapasidade di´ak nomós koñesimentu di´ak iha área indústria, ekonomia, marketing,” nia apresia.
Hodi reforsa tan katak la´ós de´it ba estudante ekonomia namoos indústria maibé ba estudante sira ne´ebé mak iha talentu oinsá mak bele dezenvolve produtu ne´e tanba talentu estudante ida-idak maski la´ós própriu mai husi área jestaun, ekonomia no indústria maibé bele mós ba estudante sira ne´ebé komprende atividade ne´e nune´e mós bele lori indústria HEINEKEN Timor-Leste ba mós iha rai seluk.
Rekruta estudante sira ho talentu ne´ebé iha, bele fó benefísiu ba ita-nia nasaun liuliu oinsá ba domíniu dezempregu namoos oinsá mak bele mós kontribui ba ita-nia dezenvolvimentu Timor-Leste komesa ona oinsá idea ba inovasaun, diversifikasaun ekonomia atu nune´e hakbesik ba ita-nia parseiru sira nune´e bele atinje ita-nia mehi hotu.
“Tanba nunka mais ita produz estudante ne´ebé ho kualifikadu, depois nia la hetan kampu traballu, ida ne´e problema,” nia salienta
“Hanoin katak governu toma konsiderasaun atu bele loke dalan ba iha investidór sira, indústria sira mai husi nasaun seluk nune´e bele lori Timor-Leste ba oin liuliu prosesu dezenvolvimentu ekonomia,” dekanu FEJ realsa.
Partisipante ida, Deonisia Maria Almeida akresenta katak programa ne´e interesante tebes hodi dezenvolve kapasidade foinsa´e sira nian no nia kapasidade rasik liuliu iha área ne´ebé aprende ona no dezenvolve tan koñesimentu iha área foun.
“Ha´u hakarak koko no aprende buat ne´ebé foun ho nasaun seluk hodi bele foti esperiénsia hodi aplika mai iha ita-nia rain,” Enjeñeira Informasaun Teknolojia (IT), UNTL, Deonisia Maria Almeida.
Enjeñeira ne´e mós husu no rekomenda ba foinsa´e sira iha Timor-Leste laran tomak katak hanesan foinsa´e eh joven katak oportunidade ne´ebé empreza HEINEKEN aprezenta kapas tebes, se hakarak buat foun, halo mudansa ba vida, aumenta esperiénsia no inovasaun bele ba envolve iha programa HEINEKEN nian.
“Ha´u fiar katak ita aprende buat foun, sei halo tan buat barak tan aprende ho rotasaun iha nasaun oioin. Mai, ita hamutuk para dezenvolve ita-nia aan, koko applay (aplika) programa ida ne´e,” nia fó hanoin.
Entretantu, Empreza Heineken hanesan empreza internasionál ida ne´ebé oras dadadun halo ona operasaun iha Timor-Leste hodi produz serveja. Tuir planu, empreza ne´e rasik, sei produz tan bebida lijeira (soft drink) no bee fresku (fresh water).
(Jornalista: Rafy Belo)
(Editór : Manuel Pinto)
