DILI, (TATOLI) – Primeiru-Ministru, Marí Alkatiri, otimista katak tasa partisipasaun komunidade iha eleisaun antesipada ne’ebé mai ne’e sei aas kompara ho eleisaun iha tinan kotuk (2017) tanba Komisaun Nasionál Eleisaun (CNE-sigla portugés) no Sekretariadu Tékniku Administrasaun Eleitorál (STAE) halo mobilizasaun boot liu iha rai laran no rai liur.
“Ha’u rasik mós tun ona ba munisípiu hotu-hotu hodi husu ba autoridade komunitáriu sira no autoridade administrativu sira para ajuda halo mobilizasaun, nune’e povu bele partisipa maka’as iha eventu demokrasia ne’ebé mai”, Xefe Governu relata ba Pezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, kuarta ne’e.
Antes ne’e iha munisípiu sira, Marí hateten eleisaun antesipada ne’ebé atu mai hanesan referendu ida atu hili programa ne’ebé hadi’a povu no dezenvolve nasaun, ka hili istória hodi hateke no hakiduk fali ba pasadu.
Jornalista: Xisto Freitas
Editora: Rita Almeida