DILI, (TATOLI) – Primeiru-Ministru, Marí Alkatiri, no Diretór Tékniku hosi kompañia Honkong Invesment Xina, David Berron Hernandes, ohin asina nota entendimentu hodi investe iha setór turizmu, liliu iha área marítima.
Ministru Turizmu, Manuel Vong, hateten serimonia ne’e kompeta kompañia estranjeiru neen maka investe ona osan iha setór turizmu, liuliu iha otél, resort (fatin ba ferias) no parke durante mandatu governu dahituk.
“Kompañia ne’e sei investe iha setór turizmu, liliu iha área marítima”, dehan governante ne’e iha Palásiu Governu.
Ministru Vong hatutan kompañia ne’e hala’o ona estudu viabilidade ba área Lauhata, munisípiu Likisa no Rejiaun Espesial Autonomu Oekusi iha marsu liubá. “Sira hala’o ona estudu viabilidade iha terenu no asina ohin, ofisialmente hahú servisu”, katak tan.
Ho koperasaun ne’e sei loke kampu servisu ba timoroan sira.
Jornalista: Agapito dos Santos
Editora: Rita Almeida
