DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, propoin ba ministru defesa foun tenke iha kapasidade dezenvolve instituisaun no tau atensaun ba forsa sira nian moris di’ak.
“Ami presiza imi nia preokupasaun hadi’a instituisaun no moris família forsa nian”, Lere hatete ba jornalista sira iha kuartel jerál Fatuhada, ohin.
Lere haktuir bainhira instituisaun dezenvolve, membru forsa sei servisu tuir misaun hodi garante dame no estabilidade.
“Ministro Defeza foun tenke servisu hamutuk ho ami lor-loron hodi jere administrativa forsa armada nian”, hatutan.
Governasaun da-ualu atu la’o di’ak hodi atinje objetivu moris di’ak, presiza apoiu hosi entidade no povu. “Ita hot-hotu tenke servisu hamutuk para bele lori Nasaun ne’e ba oin”, afirma.
Jornalista: Agapito dos Santos
Editora: Rita Almeida
