DILI (TATOLI) – Asosiasaun Tane Konsumidór (ATK) husu ona ba empreza ETO+ atu hadi’a di’ak liután kualidade transmisaun kampeonatu mundiál 2018, nune’e bele garante direitu konsumidór sira nian ne’ebé selu servisu ne’e.
“Hakarak fó hatene tan, karik la hetan resposta no alterasaun ba kondisaun hirak ne’e ba prestasaun servisu, konsekuentemente sei mantein kesar hirak ne’e hosi konsumidór, Tane Konsumidór sei hatutan ba Autoridade Nacional das Comunicações no autoridade kompetente seluk atu tane nafatin intensaun hodi defende direitu konsumidór nian”, refere komunikadu hosi Tane Konsumidór ba ajénsia TATOLI, ohin.
Direitu konsumidór hatu’ur ona iha konstituisaun RDTL artigu 53 nomós lei protesaun ba konsumidór iha númeru 8/2016, loron 8 fulan-jullu.
Tane Konsumidór iha nota imprensa ne’e haktuir simu kesar kona-ba Transmisaun Kampeonatu Mundiál ba Futeból 2018 iha semana hirak liubá.
“La’os de’it reklamasaun maibé servisu idaidak kona-ba Transmisaun ba Kampeonatu Mundiál ba Futeból 2018, iha mós kesar kona-ba servisu hosi pakote ba kanál hirak ne’ebé mak konsumidór sira hateten sinál kotu beibeik, la fó hatene ba konsumidór no kualidade laduun diak iha transmisaun”, reklama.
Entretantu, to’o notísia ne’e hatuun ajénsia TATOLI, ohin seidauk halo konfirmasaun ho empreza ne’ebé iha direitu ofisiál hodi halo transmisaun kona-ba Kampeonatu Mundiál ba Futeból 2018, desportu prestíjiu ida ne’ebé hala’o tinan haat dala ida, oras ne’e hala’o iha Rusia-Moskovo ne’e.
Jornalista: Rafy Belo
Editór : Manuel Pinto
