DILI, (TATOLI) – Emprezáriu Nasionál, Rui Castro, hateten bainhira hili profisaun ka kareira ida tenke ho vokasaun no dedika án totalmente, labele métade.
“Kada profisaun ne’ebé ita serbisu ho fuan sorin, nia rezultadu mós sei fuan sorin de’it”, afirma bainhira ko’alia iha semináriu sientífiku ho tópiku ‘Juventude Acadêmico e o Futuro e a Esperança da Igreja e da Nação Timor-Leste’ iha Institutu Siénsia no Relijioza (ICR-sigla portuges), Lahane, ohin.
Emprezáriu ne’e fó hanoin ba estudante sira katak bainhira determina idaidak nia vida, tenke dedika án no labele koko vida. Mate hotu ona.
“Iha prosesu tomak ita sempre iha esperiénsia, monu tenke hadeer. Ne’e normál. Ita moris atu la’o, dolár uluk, monu tiha koko fali la’o. Moris mak hanesan ne’e, ne’ebé kuandu la’ó mak nunka monu tanba nunka koko. Se nunka koko, nunka iha esperiénsia; imajina di’ak hela de’it”, Emprezáriu Rui Castro fó korajen.
Emprezáriu mós katak kareira ka profisaun husi ema idaidak nian mai husi prosesu ida, basa atu sai ki’ik ka boot, sai riku ka ki’ak depende idaidak nia án no esforsu ne’ebé mak ho laran no neon tomak hodi atinje.
“La iha boot ida milagre, la iha ki’ik ida milagre. Boot ne’e prosesu ida. Atu boot, atu ki’ik fila fali ba ita-nia án, La eziste iha teória moris nian. La iha buat ida, ohin hanoin aban mosu”, konsidera.
Rui Castro konsidera la iha lider timoroan ida mak hanoin aat ba rai ne’e, la iha Timoroan ida hanoin atu Timor ne’e sai ki’ak. La iha Timoroan ida hakarak Timór ne’e atu sofre.
“Maibé ne’e parte ida husi prosesu hanorin ita. Parte ida husi moris no ida ne’e babain, la’ós estraordináriu. Kuandu ita haree problema ho hanoin negativu, rezultadu mós sei negativu, se haree ho pozitivu, rezultadu mós sei pozitivu. Depende oinsá ita atu uza ida ne’ebé? Ita hakarak uza pozitivu ka negativu. Hanoin de’it pozitivu”, nia fó hanoin tan.
Jornalista: Rafy Belo
Editora: Rita Almeida
