DILI, (TATOLI) – Ministru Reforma Lejizlativa no Asuntu Parlamentár (MRLAP), Fidelis Manuel Leite Magalhães, ohin aprezenta konseitu polítika ba refórma modernizasaun institusionál públika ba Primeiru-Ministru, Taur Matan Ruak, iha Palásiu Governu.
“Ami halo aprezentasaun nota konseitu ba reforma instituisionál, konseitu, idea, proposta atu reforma administrativa”, dehan ministru ba jornalista sira hafoin sorumutu.
Fidelis hatutan sei aprezenta hodi halo diskusaun nivel ministru iha futuru. Polítika reforma administrasaun públika ne’e atu hadi’a administrasaun públika ida efisiente, profesionál, imparsiál liuhosi atendementu servisu, koordenasaun no responsabilidade entre ministériu ida no seluk.
Sorumutu ne’e, nia dehan Xefe Governu apresia ho polítika MRLAP atu reforma instituisionál, liuliu administrasaun públika.
“Hau ho ekipa sei hein fali orientasaun hosi Primeiriu-Ministru atu iha fali diskusaun tempu oin mai alargadu ho membru governu iha área relevante”, tenik tan.
Knaar MRLAP maka departamentu Governu nian ne’ebé sai nu’udar responsavel ba konsesaun, ezekusaun, koordenasaun no avaliasaun polítika ne’ebé Konsellu Ministru define no aprova ona ba dezenvolvimentu, armonizasaun no konsolidasaun ordenamentu jurídiku ba reforma judisiária ba asuntu parlamentár no komunikasaun sosiál.
Liu-liu halo estudu kle’an kona-ba reforma lei, uniformizasaun no armonizasaun lei nomós avaliasaun kona-ba nesesidade intervensaun husi Governu ka Parlamentu Nasionál; propoin no promove modernizasaun prosedimentu lejizlativu, propoin no promove reforma no modernizasaun setór judisiáriu, analiza no prepara projetu no proposta diploma legál no regulamentár sira Governu nian, iha koordenasaun ho ministériu proponente sira, propoin medida sira ne’ebé bele promove inovasaun ba administrasaun públika, liuliu liuhusi rekursu ba instrumentu governasaun eletrónika, divulgasaun kona-ba asaun no medida sira Governu nian no organiza forma no modu intervensaun públika husi Governu.
Alende ne’e, asegura koordenasaun regulár ho Parlamentu Nasionál reprezenta Governu iha konferénsia reprezentante bankada parlamentár no iha sesaun plenária sira PN nian, bainhira Primeiru-Ministru ka ministru kompetente sira responsavel ba matéria ne’e auzente ka iha impedimentu ruma.
Tradús ka akompaña tradusaun diploma legál no regulamentár sira hanesan medida atu promove asesu sidadaun nian ba direitu, propoin polítika no elabora lejizlasaun no regulamentasaun hirak ne’ebé presiza iha área komunikasaun sosiál nian, ezerse superintendénsia no tutela ba orgaun komunikasaun sosiál Estadu nian. Koordena diseminasaun informasaun kona-ba programa no asaun sira Governu nian.
Jornalista: Agapito dos Santos
Editora: Rita Almeida
