DILI, (TATOLI) – Ensinu superiór privadu, DIT (Dili Institute of Tecnology) ho lema Matenek Nodi servi, iha kada tinan létivu foun, iha ámbitu orientasaun akadémika, sempre promove tais feto no tais mane Timor-Leste nian, inklui atributu kulturál, husi munisípiu 13.
Iha atividade orientasaun akadémika ba estudante foun périodu 2019, DIT realiza orientasaun akadémika ho lema ‘Promove Kultura Liuhusi Siénsia no Teknolojia Hodi Konstrui ba Futuru Ne’ebé Prósperu’.
“Ami promove kultura tanba ida ne’e huun (ba Timor-Leste). Ema idaidak mai husi kultura idaidak, tanba ne’e mak jerasaun sira ikus ne’e bainhira sira tama iha mundu akadémiku ami sempre husu sira para uza tais atu fó koñese katak ida ne’e mak ita-nia identidade”, katak Vise-reitór Asuntu akadémiku DIT, Vital Nascimento Bareto, ba TATOLI iha nia kna’ar fatin, Kampus DIT, Aimeti laran-Manleu, ohin.
“Kuandu ita la hatene, ida ne’e mós ita bele lakon ita-nia hanoin ba oin, tanba ne’e mak kada tinan, obrigatóriu ba ami, estudante hothotu iha kada abertura, dosente sira mós uza tais”, realsa.
Akadémiku ne’e mós akresenta promosaun tais reprezenta mós karakter DIT nian ne’ebé define mós iha nia logotipu. Katak, 1) Uma tradisionál Timor-Leste: DIT hanesan instituisaun ensinu superiór exelente ne’ebé harii ho hala’o atividade iha Timor-Leste, ne’ebé sadere nafatin ba nia kultura ho identidade, hodi dezenvolve siénsia ho teknolojia hodi serbí povu ho nasaun liuhusi edukasaun, formasaun, peskiza, servisu komunitáriu ho emprezariál.
Seluk, 2) Kóroa ho kór osan-mean iha uma tradisionál leten: DIT hakarak sai hanesan instituisaun ensinu superiór ne’ebé iha kualidade aas, profesionál ho exelenti iha edukasaun, formasaun, peskiza, servisu komunitariu, jestaun ho atividade emprezariál.
Tuir mai mak 3) Livru hatudu: siénsia, teknolojia ho matenek. 4) Letra Matenek Nodi Serbi: DIT buka dezenvolve siénsia ho teknolojia hodi serbii povu ho nasaun Timor-Leste.
5) Ai-rin haat: edukasaun, peskiza, servisu komunitáriu ho emprezariál. 6) Letra DIT: reprezenta Dili Institute of Technology ne’ebé habadak ho DIT.
Enkuantu, 7) Koor mutin iha logo: DIT hala’o nia atividade tomak bazea ba hanoin ho hahalok moos, onestu ho sein diskriminasaun hodi dezenvolve siénsia ho teknolojia ba ema nia di’ak. 8) Kór azul iha logo: Domin no Dame. Siénsia ho teknolojia tenki dezenvolve iha domin ho dame laran, no ba interese dame ho domin nian.
“Atu reprezenta katak DIT ne’e nia la’o teknolojia maibé kultura ne’e sempre iha laran, ida ne’e sai hanesan identidade no huun hodi nune’e estudante sira sai no hatene; ha’u matenek, ha’u timoroan. Ha’u-nia identidade mak ne’e”, esklarese akadémiku ne’e.
“Tanba ida ne’e mak ami hatama iha atividade akadémika, iha orientasaun ne’e ho tais, ho símbolu sira, depois loke mós, loke ho baku babadok hodi nune’e ita-nia estudante sira bele hatene katak ami ne’e timoroan”, reforsa tan.
Iha fatin hanesan, Emanuel Santos Pereira Gusmão, nu’udar Vise-prezidente DITSA (DIT Student Association) ba TATOLI hateten kada tinan atividade orientasaun, DIT iha loron dahuluk no ikus sempre utiliza tais hodi promove identidade Timór nian husi jerasaun ba jerasaun. “Atu nune’e ita-nia identidade labele lakon”.
Nia katak atividade orientasaun ne’e sei hala’o durante semana ida, hahú ohin to’o sesta (22/02), ho tipu atividade sira mak hanesan palestra, limpeja jerál iha kampus depois sei kuda mós ai-oan iha resintu eskola nian.
“Iha mós planu sei konvida DEJUCKDIL (Departamentu Juventude Katólika Dioseze Díli-sigla portugés) atu halo reflesaun ba estudante sira”.
Vise-prezidente DITSA mós haktuir estudante foun ne’ebé tuir orientasaun ne’e hamutuk na’in 300 resin kompostu husi fakuldade haat, departamentu 12.
Entretantu, DIT nu’udar ensinu superiór privadu ho non-profitu ne’ebé oferese edukasaun, formasaun, peskiza ho servisu komunitáriu.
DIT inaugura husi Kay Rala Xanana Gusmao, nu’udar Prezidenti Associação Veterano da Resistencia (AVR) iha Dili, iha loron 10 maiu 2002. Loron ne’e mós hanesan loron Dies Natalies DIT nian.
Jornalista: Rafy Belo
Editora: Rita Almeida
