iklan

EKONOMIA, NASIONÁL

IPK Janeiru Iha Inflasaun Porsentu 0.3

IPK Janeiru Iha Inflasaun Porsentu 0.3

Diretór Jerál Estatístika Ministériu Finansas, Elias dos Santos Ferreira. Foto/MF.

DILI, (TATOLI) – Diresaun Jerál Estatístika Ministériu Finansa (MF) lansa ona Índise Presu Konsumidór (IPK) janeiru 2019 nian ne’ebé hatudu katak akontese inflasaun iha fulan ne’e maka porsentu +0.3 kompara ho dezembru 2018 iha mós inflasaun porsentu +0.1.

Diretór Jerál Estatístika, Elias dos Santos Ferreira, informa inflasaun +0.3% ne’e nia kontribuisaun maioria husi grupu edukasaun +9.0%, hahán no hemun la’ós alkólika +0.2%, no alkol no tabaku +0.6%.

“Tanba saida maka edukasaun iha inflasaun porsentu 9, ita bele hatene iha Timor-Leste anu eskolár ne’e komesa iha janeiru, pur tantu janeiru tama eskola, inan-aman sira tenke hola kadernu, lapijeira, selu propina, maibé ba hahán no foos laiha mudansa”, Elias afirma iha Kaikoli hafoin lansamentu IPK ne’e.

Enkuantu iha grupu transporte iha deflasaun -0.3% sai hanesan mudansa kontráriu (offset) ba inflasaun grupu hotu.

Grupu hahán no bebida la’ós alkólika sa’e hetan impaktu maioria husi sub-grupu vejetál +1.2%, susuben, keiju no manutolun +1.9%, no mina bokur +1.0%.

Subgrupu masin-midar, marmelada, banibeen no confectionery -0.7%, produtu ai-han -0.4% no naan -0.1% sai hanesan mudansa kontráriu ba grupu hahán no bebida la’ós alkólika.

Iha parte seluk, presu mina internasionál tun -28% iha trimestre ikus 2018 hodi afeta presu mina transporte iha merkadu rai-laran.

Sobre mudansa persentajen IPK anuál sa’e +1.7% kompara janeiru 2019–janeiru 2018, hetan kontribuisaun husi grupu hahán no bebidas la’ós alkólika +1.4%, alkol no tabaku +10.9%, edukasaun +9.0%, transporte +3.5%, uma +0.7%, no rekreasaun no kultura +0.5%.

Ekipamentu no manutensaun mobilária uma-laran -0.5%, hatais no sapatu -0.5% no komunikasaun -0.1% sai hanesan mudansa kontráriu ba anuál janeiru 2019.

Inflasaun Tradable (hanesan mudansa presu produtu hotu ne’ebé iha dependénsia maka’as ba kompetisaun merkadu internasionál) +0.2% no non-tradeable (hanesan mudansa presu produtu hotu ne’ebé iha dependénsia ba fatór merkadu doméstiku) +0.3% sa’e iha mensál janeiru 2019–dezembru 2018 Inflasaun tradable (+1.6%) no non-tradeable +1.0% sa’e iha anuál kompara janeiru 2019–Janeiru 2018.

Lee mós : http://www.tatoli.tl/2019/01/indise-presu-konsumidor-dezembru-akontese-inflasaun/

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!