DILI, (TATOLI) – Prezidente Parlamentu Nasionál (PN), Arão Noe de Jesus, hateten to’o agora PN seidauk simu karta hosi tribunál kona-ba levantamentu imunidade deputadu bankada CNRT, Francisco Kalbuadi Lay.
“Ami seidauk simu karta hosi tribunál kona-ba levantamentu imunidade. Buat ne’ebé ami simu maka pedidu retoma mandatu hanesan deputadu, tanba nia (Kalbuadi) titulár”, Arão ba jornalista sira iha Palásiu Prezidente Nicolau Lobato, Bairru Pité, kuarta ne’e.
Nia rekoñese Francisco Kalbuadi Lay maka husu retoma fali ninia mandatu no ne’e konsideradu direitu ida.
Maski nune’e, Arão hateten, prosesu ba levantamentu imunidade Kalbuadi la’o hela tanba antes ne’e mós PN autoriza ona deputadu balun ba kumpre devér iha tribunál, tanba ne’e laiha ema ida maka sei trava.
“Se pedidu tama mai prosesu sei la’o. Prezidente Parlamentu Nasionál sei baixa pedidu ne’e ba komisaun A asuntu lei no justisa hodi halo pareser mai iha Prezidente Parlamentu Nasionál depois plenária maka sei desidi”, nia haklaken.
Kona-ba públiku konsidera Kalbuadi subar iha imunidade, nia hatán kabe ba ema ida-idak nia interpretasaun, maibé importante maka PN seidauk simu notifikasaun hosi tribunál kona-ba levantamentu imunidade refere.
Jornalista: Xisto Freitas
Editora: Rita Almeida
