iklan

INTERNASIONÁL, EDUKASAUN

Portugal ho Argentina Kompromete Kapasita Jornalista Timor-Leste

Portugal ho Argentina Kompromete Kapasita Jornalista Timor-Leste

Asina akordu triangulár entre Portugal, Argentina no Timor-Leste iha Lisboa, SEsta (28/06/2019). Imajen/ Rafy Belo

LISBOA, 28 juñu 2019 (TATOLI)-Portugal, Argentina liuhusi asina akordu triangulár ho Sekretáriu Estadu Komunikasaun Sosiál (SEKOMS), kompromete apoiu jornalista timoroan sira através programa konsultóriu língua portugeza, hodi hala’o kna’ar ho profisionál liután.

“Ha’u hakarak asosia no sauda empeñu ne’ebé mak ita iha, iha konkretizasaun instrumentu (akordu triangulár) ne’ebé mak ita asina, nu’udar instrumentu ne’ebé mak importante ba formasaun jornalista hodi nune’e sira bele hato’o notísia ho dignidade, objetividade ne’ebé mak  esensiál ba konstrusaun sidadania iha Timor-Leste,” hateten Sekretária Estadu Negósiu Estranjeiru no Kooperasaun Portugal, Teresa Ribeiro, iha ámbitu asinatura akordu triangulár, iha Lisboa, Sesta (28/06/2019).

Nia dehan, programa konsultóriu ne’e projetu ida ne’ebé mak enkaixa di’ak iha kooperasaun Portugal no Timor-Leste iha area komunikasaun sosiál.

“Ita iha ona projetu ida ne’ebé mak la’o hela, ne’ebé mak sei renovadu, kontinuadu; konsultóriu língua ba jornalista sira. Projetu ne’ebé mak fó rezultadu pozitivu, ne’ebé mak koñesidu husi belun doben timoroan sira, ne’ebé mak defaktu permite kualifika komunikasaun sosiál iha Timor-Leste,” hateten sekretária estadu ne’e.

Autoridade portugeza ne’e hateten mós katak aposta iha programa konsultóriu lingua ne’e reforsa prioridade kooperasaun Portugal ho Timor-Leste, ne’ebé mak naturalmente reforsa língua portugeza, edukasaun no multiplikasaun suporte, instrumentu hotu ne’ebé mak bele kontribui ba diseminasaun língua portugeza.

“Ha’u só bele kongratula ba serimónia ne’ebé mak ohin iha ne’e, ba asinatura protokolu ida ne’e. Agora buat ne’ebé ita hakarak mak ho lalais protokolu ida ne’e bele operasionalizadu, no hamutuk alargadu liután ba jornalista sira iha organizasaun komunikasaun sosiál Timor-Leste; husi jornál sira, televizaun, ajénsia (notisioza) sira bele mós benefisia ba formasaun sira ne’ebé mak sei disponibilizada iha projetu ne’e”.

Enkuantu, Governu Timor-Leste liuhusi Sekretáriu Estadu Komunikasaun Sosiál, Mericio Juvinal dos Reis “Akara” hateten katak Oitavu Governu Konstitusionál kontente tanba bele asina akordu triangulár entre Timor-Leste, Portugal no Argentina ne’ebé mak sei fó atensaun maka’as atu apoia jornalista timoroan sira iha área téknika liuliu iha multimedia no mós dezenvolve língua ofisiál portugés.

“Parte tolu iha comitmet (kompromisu) atu kolabora para aumenta ita-nia jornalista sira-nia kapasidade. Ida ne’e mak importante husi asina akordu ohin,” kompromete sekretáriu estadu.

“Espera kooperasaun ida ne’e la’o ho di’ak, hetan susesu, rezultadu di’ak ba ita hotu liuliu ba ita-nia jornalista sira,” tenik governante ne’e.

Iha biban hanesan, Argentina liuhusi nia embaixadór, Óscar Armando Moscariello konfirma pozisaun Argentina nian kona-ba apoiu profisionál komunikasaun sosiál timoroan sira liuhusi akordu ne’ebé mak país tolu ne’e asina hamutuk.

Asina akordu triangulár entre Timor-Leste, Portugal no Argentina asiste direta husi Prezidente Konsellu Administrasaun RTTL.EP (Rádiu no Televizaun Timor-Leste), Francisco da Silva Gari, Prezidente Ajénsia TATOLI.IP-Ajénsia Informasaun Ofisiál Estadu Timor-Leste, José da Costa, Xefe Gabinete SEKOMS, Júlio Gonçalves inklui asesór.

Notísia relevante: http://www.tatoli.tl/2019/06/secoms-asina-akordu-triangular-entre-timor-portugal-no-argentina/

Jornalista      : Rafy Belo

Editór            : Francisco Simões

iklan
iklan

Leave a Reply

iklan
error: Content is protected !!