DILI, 16 jullu 2019 (TATOLI)-Médiku timoroan, Rui Maria de Araújo fó hanoin katak joven sira hotu ne’ebe agora prepara aan hela, no mós apela ba profisionál hotu iha área saúde ita tenke iha konsiente katak ita-nia profisaun iha kodígu étika ida ne’ebé sai hanesan baze importante ba ita hotu, bainhira ita hala’o kna’ar lorloron.
“Tenke kaer metin baze profisionál ida ne’e, lori orienta ita-nia servisu ba oin,” hateten Doutór Rui Maria de Araújo iha ámbitu semináriu “Tinan 25 iha Kareira Médika: Serbi Ema Moras, Povu No Nasaun” hamutuk ho médiku na´in tolu seluk hanesan doutór Avelino Guterres Correia, doutór Domingos da Silva no doutór João Martins, iha salaun CNE (Sentru Nasionál Eleisaun-sigla portugés), Colmera, tersa (16/07/2019).
Doutór Rui Maria de Araújo fó hanoin tan ba médiku timoroan sira katak bainhira ita foti ona desizaun atu sai profisionál, tenke iha konsisténsia, tenke iha prezervansa, hala’o servisu tuir ita-nia profisaun no hala’o servisu tuir kodígu étika ne’ebé profisaun idaidak iha.
“Liliu ami iha medisina ami iha juramentu ipokratiku ne’ebé ami halo bainhira hahú ami-nia profisaun. Ohin loron 16 jullu ne’e ami na´in rua doutór João Martins halo kompletu 25 anos ba juramentu ida ne’e. Doutór Domingos da Silva ho doutór Avelino Guterres, sira halo iha marsu, fulan kotuk, maibé iha tinan ida ne’e ami na´in haat hamutuk selebra 25 anos,” haktuir médiku timoroan ne´e.
Nia akresenta tan, partilla esperiénsia ohin (semináriu), fahe ba mediku sira katak, iha forma ida atu kontribui no apelu ba mediku sira: “Liliu juramentu ipokratiku ne’ebé ami hotu iha, molok ami hahú halo ami-nia profisaun ida ne’e (profisionál saúde) tenke iha baze importante ba ami nia servisu lor loron”.
Notísia relevante:
Jornalista : Felicidade Ximenes
Editór : Rafy Belo
