DILI, 29 jullu 2019 (TATOLI)-Ministériu Solidariedade Sosiál no Inkluzaun (MSSI) ho kooperasaun hosi Diresaun Administrasaun Munisípiu Dili, Diresaun Forensik Ospitál Nasionál Guido Valadares (HNGV-sigla portugés) no Ministériu Saúde (MS), ohin, halo’ot ona mate isin bebé mane deskoñesidu na’in rua iha Semitériu Becúse, Dili.
Diretór Diresaun Nasionál Asisténsia Sosiál, Mateus da Silva, hateten, mate isin bebe na’in rua ne’e, Polísia Nasionál Timor-Leste (PNTL) identifika ida iha área Tasi-tolu iha loron 14 fulan jullu no ida seluk iha Semitériu Santa Crus iha loron 24 fulan jullu, foin lalais ne’e, ne’ebé hetan ho kondisaun sunu motuk hosi ema deskoñesidu.
MSSI liuhosi diresaun Nasionál Asisténsia Sosiál maka aloka orsamentu hamutuk $500 hodi suporta serimónia fúnebre ne’e.
“Osan ne’e hodi sosa kaixaun, rai-henek, blok, simente no selu ema badaen ke kuak no hada blok hosi rai laran hodi halo’ot mate isin bebé na’in rua ne’e,” informa Diretór Mateus da Silva, iha Semitériu Becúse, hafoin hala’o serimónia fúnebre bebé na’in rua ne’e.
Ministériu Solidariedade Sosiál no Inkluzaun (MSSI) ho ekipa transporta mate isin hosi sala Mortuáriu HNGV iha tuku 10:00 Otl, hodi kontinua halo’ot iha Semitériu Becúse.
Kazu Soe Bebé, PPN Husu Judisiál Fó Justisa Ho Justu
Jornalista : Nelson de Sousa
Editór : Francisco Simões
