DILI, 22 jullu 2019 (TATOLI) – Primeiru-Ministru, Taur Matan Ruak, enkoraza ekipa ajénsia notisioza TATOLI, IP labele deziste maske hasoru dezafiu oin-oin.
“Hakarak hatete ba imi katak loron aban iha imi nia liman laran, imi labele deziste, halo esforsu tomak para hadi’a buat sira ne’ebé seidauk di’ak, hametin no haburas, konkista sira ne’ebé imi halo iha tinan tolu nia laran”, Primeiru Ministru enkoraza iha ninia mensajen ba TATOLI nian transformasaun hosi embriaun ba Institutu Públiku.
Xefe Governu hatutan: “Ha’u dezeja susesu ba viajen imi nia, la fásil, maibé konta ho Governu nia apoiu ho ha’u nia apoiu rasik”.
Iha ninian mensajen durante ezisténsia TATOLI ba tinan tolu, nia afirma: “Okaziaun ida imi atu transforma imi nia án ba institutu públiku no mós momentu ida ne’ebé imi halo tinan tolu ezisténsia, ha’u hakarak lori Governu nia naran no ha’u nia naran rasik fó parabéns ba TATOLI”.
Tuir Xefe Governu iha Estadu Direitu Demokrátiku ne’e, Estadu valoriza partisipasaun sidadaun nian iha prosesu dezenvolvimentu nasionál ne’ebé inkluzivu.
“Prosesu dezenvolvimentu inkluzivu katak sidadaun partisipa no nia tenke hetan informasaun di’ak kona-ba saida mak Governu hanoin no hakarak halo, halo iha ne’ebé, halo tanba saida, iha interese, nune’e bele fó sira nia kontribuisaun”, nia afirma.
Nune’e, PM dehan Governu fó importánsia no valoriza maka’as ba mídia sira, tantu mídia nasionál, internasionál, privadu no mós Estatal.
“Iha ita nia kazu ne’e, alende ita uza mídia privadu sira, Estadu mós esforsa atu dezenvolve ninia mídia rasik. Ita koa’lia kona-ba ajénsia TATOLI no mós Rádiu Televizaun Timor-Leste (RTTL). Estadu investe osan no investe tempu hodi bele dezenvolve”, nia realsa.
Xefe Governu akresenta, VIII Governu kontinua fó atensaun no halo esforsu para bele investe iha mídia sira no prepara planu para bele halo investimentu boot iha tinan oin, liu-liu ba infraestrutura, inklui ajénsia TATOLI no mós televizaun, tanba populasaun barak seidauk asesu ba informasaun.
“Governu fó atensaun no sei halo investimentu para bele dezenvolve infraestrutura, ekipamentu, rekursu umanu, para hakbiit di’ak liután fonte informasaun Estatal sira, hanesan RTTL nomós ajénsia Tatoli en partikulár”, nia dehan tan.
Jornalista: Julia Chatarina
Editór: Xisto Freitas
