DILI, 5 agostu 2019 (TATOLI) – Koordenadór Nasionál Universidade da Paz (UNPAZ) Klase Paralela, José Gama dos Santos hateten, klase paralela (klase sosiál)ne’ebé UNPAZ harii iha Munisípiu Covalima no Ermera ne’e mai husi Fakuldade Direitu ne’ebé akredita ona tan ne’e klase paralela Fakuldade Direitu la presiza hetan lisensa tan.
“Ha’u hakarak hateten de’it katak klase paralela ne’e UNPAZ mak harii primeiru iha 2007 depois lao tiha tinan barak foin mak hetan avaliasaun husi governu kona-ba estabelesimentu klase paralela ne’e rasik. Entaun ita atu ko´alia kona-ba lisensiamentu kabe ba esbosu lei ne’ebé MESSK hamosu ne’e la-apar ona. Tanba esbosu lei ne’e rasik atu haree kona-ba institutu universidade no institutu akademiku sira,” hateten Kordenadór José Gama dos Santos ba Ajénsia TATOLI, iha nia kna´ar fatin UNPAZ, Osindo, Manleuana, Dili, segunda (05/08/2019).
Nia mós hatutan klase paralela ne’e UNPAZ hari tanba iha ona akordu ho estudante sira katak klase paralela ne’e difisil atu hari biblioteka, entaun dosente sira iha loron sesta aranka husi Dili ba Suai mak foin lori livru referénsia sira hodi fó ba estudante sira halo kópia.
“Depois estudante sira ne’ebé envolve ona iha klase paralela ne’e obrigasaun kada semana tenke tun mai Dili atu bele asesu ba livru sira iha biblioteka. Planu ida ne’e la´ós universidade mak halo maibé estudante klase paralela mak halo konkordánsia ida ne’e,” nia esplika.
Akadémiku ne’e mós haforsa tan katak kuandu dosenste sira laiha posiblidade atu ba Suai hodi hanorin estudante sira, entaun dosente sira sei kontaktu ba estudante sira atu tun de’it mai Dili hodi tuir prosesu ensinu aprendijazen iha universidade atu bele hetan materia.
Portantu husi ezisténsia klase paralela Suai ne’e agora daudaun iha de’it estudante hamutuk 18 mak sei ativu. Antes ne’e kuaze 28 estudante mak envolve iha klase paralela ne’e maibé tan razaun seluk estudante lubuk ida la marka ona sira-nia prezensa.
Tuir kritériu kada klase tenke prienxe 25 estudante mak klase paralela ne’e bele hala’o.
“Ita presiza hatene katak volume klase paralela ne’e diferensa fakuldade sira iha kampus nasionál oras ne’e daudaun iha de’it estudante 18 pessoas mak sei ativu. Antes ne’e ita iha 28 estudante mak rezista maibé ita prontu fasilta nafatin estudante 18 ne’e tenke to’o remata atu sira labele sai vítima,” nia dehan.
Entertantu, UNPAZ iha meius atu loke institutu, satelit iha Suai atu bele responde ezijénsia komunidade sira nian husi Munisípiu Bobonaro no Ainaro ho ida ne’e mak UNPAZ sei halo lisensa ba governu atu hare kestaun ne’e. Agora avaliasaun governu nian iha eskola paralela Suai ne’e kompeténsia Ministru nian.
Notísia relevante: Reitór UNPAZ Prontu Fasilita MESSK Hasoru Estudante Klase Paralelu
Jornalista :Tomé Amado
Editór : Rafy Belo
