GLENO, agostu 2019 (TATOLI) – Prezidente Autoridade Munisípiu Ermera, José Martinho dos Santos Soares, hateten Ermera-oan hotu orgullu tanba bele iha ona estádiu foun, Kafé Ermera, nune’e bele fasilita joven sira hodi prátika desportu ho di’ak.
“Hanesan Ermera-oan sente orgullu, tanba ami bele iha ona estádiu ida, nune’e joven sira bele mós pratika desportu ho di’ak, tanba tinan barak ona ami hein maibé ohin loron foin akontese,” dehan José Martinho ba Jornalista sira, iha Estádiu Kafé Ermera, tersa ne’e.
Notísia Relevante: SEJD Inaugura Ona Estádiu Kafé Ermera
Nune’e, lori povu Ermera hotu nia naran, nia agradese ba Governu, liuliu Sekretaria Estadu Juventude no Desportu (SEJD) ne’ebé bele harii ona estádiu ho kualidade iha Ermera.
“Ami agradese ba Governu tanba ohin ami komesa hakat pasu foun ida ba oin. Ami mós iha klube ida ne’ebé koñesidu ho naran Kafé, tanba ne’e ba oin ami sei promove di’ak liután klube ne’e, atu lori ba oin nafatin,” subliña José Martinho.
Nia fiar katak ba oin Ermera-oan sira bele sai jogadór di’ak iha nível nasionál no internasionál.
Jornalista: Hortençio Sanchez
Editór: Xisto Freitas
