DILI, 12 setembru 2019 (TATOLI) – Diretór Terras Propriedade (DTP) Munisípiu Liquiça, Tito Serrão da Silva, informa, ohin, katak, iha tempu badak nia laran Estadu Timor-Leste liu husi Ministériu Justisa, Diresaun Nasional Terras Propriedade (DNTP), Diresaun Terras Propriedade Liquiça ho kompañia China Harbour Engineering (CHE) sei halo rekursu ba desizaun Tribunal Distritál Dili (TDD) kona-ba disputa rai ba produsaun britas iha Kaitehu, Suku Bazartete, Munisípiu Liquiça.
Notísia Relevante : Rai Kaitehu, DTP Liquiça Hatama Relatóriu Ba DNTP
“Horisehik, ha’u hetan kontaktu kedas husi Ministériu Justisa liu husi DNTP hamutuk ho entidade balun hodi hasai desizaun alternativa ida katak sei halo rekursu ba Tribunal Rekursu,” informa Tito Serrão da Silva, ba Ajénsia TATOLI bainhira remata entrega dokumentu relevante ba rai Kaitehu nian ba DNTP, iha Edifísiu DNTP, Bebora, Dili.
Notísia Relevante : Disputa Rai Kaitehu, MJ Promete Sobu “Mafia” Justisa
Nia konfesa katak, prosesu hotu la’o iha tribunal kona-ba disputa rai Kaitehu nia la iha koñesimentu no nunka hetan notifikasaun husi Tribunal atu bele kolabora depoimentu ruma kona-ba rai refere.
Tito mós esplika katak antes nee iha ona dokumentu ofisial husi Governu liu husi Ministériu Justisa hodi permite ona ba kompañia China Harbour maibé desizaun Tribunal oin seluk fali hodi kontra katak rai refere Marino Enterprise nian.
Razaun seluk, Tito hateten, nu’udar diretór DTP nia tenke defende dignidade estadu nian ne’ebé mak tutela ba rai no propriedade iha Munisipiu Liquiça.
Jornalista : Domingos Piedade Freitas
Editór : Francisco Simões
