AILEU, 16 setembru 2019 (TATOLI)—Diretór Nasionál Sentru Rádiu Komunitáriu (CRC-sigla Portugés), Abel da Conceição informa katak diresaun CRC simu tape recorder rua (2) ho desktop ida husi parseiru internasionál Fundu Nasaun Unida Ba Labarik Sira (UNICEF-sigla inglés), hodi apoiu programa ida ho naran rejistu moris iha territóriu laran tomak.
Tanba ne’e, Fundu Nasaun Unida Ba Labarik Sira serbisu hamutuk ho Sentru Rádiu Komunidade no SECOMS atu fasilita ekipamentu sira ne’e para apoiu ba programa rejistu moris iha Timór laran tomak.
“Ita fazeadamente fó uluk tape recorder rua ho desktop ida. Depois ita esforsu sente katak apoiu ne’e mínimu hela maibé ba oin sei kompleta tan saida mak seidauk iha. Maibé, ita espera katak rádiu sira bele uza lai ida ne’e hodi asesu ba ita-nia programa sira ne’ebé mak iha nível munisípiu nian,” dehan Diretór Nasionál Sentru Rádiu Komunidade, Abel da Conceição, ba jornalista sira iha serimónia Sekretáriu Estadu Komunikasaun Sosiál entrega ekipamentu ba Rádiu Rai Husar Aileu loron hirak liubá.
Nia hatutan, CRC esforsu hela oinsá tinan ba tinan ne’e kontinua fó formasaun ba jestór sira para oinsá sira iha koñesimentu no kapasidade ne’ebé natoon atu investe iha rádiu no mós haree ba notísia importante sira ne’ebé mak iha munisípiu nia laran.
Rádiu Komunidade Rai Husar Aileu, nia informa, iha jornalista na’in neen (6) ne’ebé bele halo kobertura ba nível munisípiu nian. Aleinde fó apoiu komputadór, nia dehan, iha fulan ne’e nia laran, liuhusi Fundu Transferénsia Públiku husi SEKOMS transfere ona osan ba rádiu komunidade sira-nia konta bankária ida-idak.
Iha fulan ida ne’e nia rohan, nia informa, kada rádiu komunidade sira sei hetan motorizada ida para atu apoiu sira-nia serbisu kobertura iha área rurál sira.
Notísia relevante:SEKOMS Oferese Audio-Gravadór Rua Ho Komputadór Ida Ba Rádiu Rai Husar Aileu
Jornalista : Felicidade Ximenes
Editór : Rafy Belo
