DILI, 19 setembru 2019 (TATOLI) – Diretór Jerál Autoridade Aduaneira (AA), José António Fátima Abílio, informa Autoridade Aduaneira asina protokolu kooperasaun ho Banku Nasionál Komérsiu Timor-Leste (BNCTL, sigla portugés) hodi fó tan espasu ba importadora no despaxante sira bele selu taxa alfandegária.
“Ita hotu hatene katak iha períodu anteriór, BNU maka kobra reseita Alfándega, maibé ami haree katak ladún iha kompetisaun ho banku sira, nune’e maka ohin ami asina akordu ne’e ho BNCTL”, José Antonio ba jornalista sira iha ámbitu asinatura protokolu kooperasaun iha sala reuniaun AA, área Palásiu Governu, ohin.
Durante ne’e, Autoridade Aduaneira ho BNCTL halo ona serbisu, maibé ohin loron maka foin halo asinatura ofisiál atubele halo transferénsia konta pagamentu taxa Alfándega nian.
Nune’e, José António husu ba kliente sira haree banku ne’ebé maka prestasaun di’ak, bele buka ida ne’e atu fasilita lais, hanesan BNCTL ho Banku Nasionál Ultramarinu (BNU).
Objetivu prinsipál ida tan hosi akordu ne’e, atu komplementa reforma ne’ebé maka AA halo dezde 2014 to’o agora.
Hodi haktuir BNCTL mós prontu ona atu extende sukursál iha fatin hirak ne’ebé seidauk iha atu kobre reseita, nune’e bele ajuda ona Alfándega atu halo kobransa reseita diretamente ba banku.
“Atu ita hatudu prosesu transparénsia públika hanesan meiu ida atu eduka ema hotu liuhosi Alfándega sei hala’o kna’ar ho prosesu halo kontajen taxa atu selu”, katak.
Ho BNU ajuda tebes tanba jestaun finansa públiku presiza asegura prosesu transparénsia, akuntabilidade hodi garante katak labele iha fraude fiskál no labele lori risku ba kobransa reseita Aduaneira nian.
Parte seluk, Prezidente Konsellu Administrasaun BNCTL, Brígido de Sousa, agradese no orgullu tanba bele hetan fiar hosi autoridade atubele hamutuk hodi asina protokolu kooperasaun entre BNCTL ho AA ba atendimentu públiku liuhosi taxa.
“Ami la haree ba parte negósiu de’it, maibé tanba banku Estadu nian, banku iha obrigasaun atu fasilita. Tanba ne’e, BNCTL durante ne’e simu reseita barak hosi Governu ne’ebé halo pagamentu”, dehan Brígido de Sousa.
Maibé BNCTL mós sei haree internál banking, ezemplu, kompañia boot ne’ebé kaer importasaun boot, hanesan mina, bele selu taxa to’o millaun $1.
Jornalista : Zezito Silva
Editora : Maria Auxiliadora
