DILI 26 setembru 2019, (TATOLI) – Governu Austrália liuhosi Workforce Development Program Timor-Leste (WDPTL) koopera ho Sekretáriu Estadu Formasaun Profisionál no Empregu (SEFOPE) reabilita ona edifísiu Diresaun Nasionál Empregu Exteriór (DNEX).
Objetivu atu fasilita di’ak liután funsionáriu SEFOPE nian hodi fó atendimentu di’ak ba kandidatu timoroan antes bá serbisu iha Austrália no Korea.
Aléinde reabilita edifísiu ne’e, apoia mós ekipamentu sira hanesan laptop, komputadór, mákina fotokópia, impresora, kursu lian inglés ba funsionáriu SEFOPE, re integra traballadór sira bainhira fila hikas mai Timór.
Governu liuhosi SEFOPE, Julião da Silva, agradese ba apoia hirak ne’e, nune’e bele atende timoroan sira ho dignu.
“Agradese ba Governu Austrália apoia ita hodi hadi’a edifísiu ne’e hodi fó kondisaun di’ak ba kandidatu sira bá Austrália no Korea. Ita tenke fó fatin di’ak ba timoroan sira nune’e sira bele tuur hodi trata sira-nia dokumentu, tanba durante ne’e kandidatu barak no fatin mós ladún sufisiente ba sira. Nune’e mós atu fasilita mós funsionáriu SEFOPE nian atu fó atendimentu di’ak ba kandidatu sira”, dehan Julião da Silva iha ámbitu entrega edifísiu DNEX ne’ebé reabilita ona husi WDPTL.
Embaixadór Austrália iha TL, Peter Robert, argumenta Governu Austrália prontu nafatin apoia Timor-Leste hodi fasilita traballadór timoroan hodi bá serbisu.
“Apoia ne’e mai hosi Workforce Development Program Timor-Leste, importante liu mak programa ne’e di’ak ba Timor-Leste no Austrália, tanba timoroan bele hetan esperiénsia liuhosi serbisu iha Austrália no hetan rendimentu, dezenvolve kapasidade no toos-na’in Austrália nian depende ba timoroan atu prodús produtu kualidade di’ak liu iha Austrália”, dehan Peter Robert.
Diplomata australianu ne’e afirma, tinan ne’e (2019) timoroan ne’ebé serbisu iha Austrália hamutuk 1.500, no iha esperansa katak iha futuru timoroan serbisu barak liután iha ne’ebá.
Tuir Peter Robert katak, DNEX ne’e importante tebes tanba bele ajuda funsionáriu SEFOPE nian ne’ebé tulun hodi prepara traballadór sira atu hetan esperiénsia iha Austrália, klaru katak serbisu-na’in timoroan sira sai demanda iha Austrália.
Edifísiu DNEX ida ne’e bele akomoda funsionáriu hamutuk 14 ho janela atendimentu 11, hodi fó atendimentu ba kliente, no kompleta ho sala enkontru.
Jornalista : Antónia Gusmão
Editora : Maria Auxiliadora
