DILI, 01 outubru 2019 (TATOLI) – Sekretáriu Jerál Federasaun Karate-do Timor-Leste, António Carlos de Araújo, hateten atleta karate-do ne’ebé atu partisipa iha jogu sudeste aziátiku (Sea Games) preparadu ona hahú kedan iha janeiru to’o agora.
“Bainhira ami hatene ona katak tinan ne’e sei iha Sea Games entaun ami komesa prepara kedan atleta sira iha janeiru liu ba. Sira hahú hala’o treinamentu maski seidauk hetan tulun hosi Governu maibé foin lalais iha fulan hirak liu ba foin mak hetan osan uitoan hosi Governu hodi hala’o treinamentu”, tenik António Carlos ba Agência Tatoli iha Zinajiú Dili, tersa ne’e.
Tuir ajenda ne’ebé iha, Sea Games ba dala-30 sei realiza iha Filipina iha loron 30 novembru to’o 11 dezembru 2019.
Nune’e, tanba limitasaun orsamentu, Karate-do sei haruka atleta nain-haat de’it mak partisipa iha eventu internasionál ne’e.
Atleta haat ne’ebé sei partisipa iha jogu sudeste aziátiku ne’e maka, Letísia de Araujo sei joga hosi kilograma menus hosi 50, Fidelis Soares klase menus hosi kilograma 67, Andreas Kefi klase kilograma menus hosi 55, no Dionísio Kefi iha klase menus hosi kilograma 60.
Jornalista: Hortencio Sanchez
Editór: Xisto Freitas
