DILI, 03 outubru 2019 (TATOLI) -Diretór Nasionál Diresaun Empregu no Exterior (DNEE) husi Sekretáriu Estadu Polítika Formasaun Profisionál no Empregu (SEFOPE), Filomeno Soares, komprometidu atu buka tuir “mafia” sira ne’ebé mak durante ne’e halo manobra ba rekrutamentu traballadór timoroan sira atu ba serbisu iha Australia ho Korea do Sul.
Notísia Relevante : Laiha SOP Hamosu Irregularidade iha Rekrutamentu Traballadór husi SEFOPE
Kompromisu ne’e Filomeno Soares, hato’o perante operasaun konjunta; Komisaun Anti Korrupsaun (CAC-sigla portugés), Komisaun Funsaun Públiku (CFP-sigla portugés) Inspektór Jerál Estadu (IGE-sigla portugés) ho Provedoria Direitus Umanu no Justisa (PDHJ-sigla portugés), ohin, bainhira halo inspesaun ba SEFOPE Becora.
“Ha’u hakarak klarifika ba iha públiku katak mafia ne’ebé mak iha SEFOPE liu husi Diresaun Nasionál Empregu no Exterior (DNEE) sei buka no simu sasán husi kandidatu seluk, ha’u sei buka tuir,” afirma Filomeno Soares.
Nia alerta ba públiku no kandidatu traballadór sira ne’ebé mak kaer evidénsia ruma kona-ba indikasaun korrupsaun, koluzaun no nepotizmu (KKN) iha rekrutamentu durante ne’e atu ajuda SEFOPE aprezenta para bele loke prosesu no funsionáriu sira ne’ebé halimar ho manobra sira ne’e.
“Kona-ba mafia ha’u seidauk deskobre tanba ha’u foin fulan ida asume knar iha DNEE,” hateten Filomeno Soares.
Jornalista : Domingos Piedade Freitas
Editór : Francisco Simões
