DILI, 03 outubru 2019 (TATOLI) – Estadu Timor-Leste liuhosi Primeiru-Ministru (PM),Taur Matan Ruak, iha simeira internasionál lansa ona konkursu públiku ba mina no gás hamutuk bloku 18. Bloku foun 18 ne’e kompostu husi 11 iha tasi-laran no hitu iha rai-maran.
Prezidente Autoridade Nasionál no Petróleu (ANPM), Gualdino da Silva, iha ámbitu simeira internasionál Mina no Gás iha Sentru Konvensaun Dili, ohin, hatete konkursu públiku ne’e Timor-Leste loke ba investidór internasionál sira atubele mai kandidata ba.
“Ita sei loke ba investidór petróleu nia iha mundu tomak atubele mai aplika ba konkursu sira ne’e, kuandu sira aplika ba konkursu ne’e sira mai halo estudu ba dadus no informasaun sira ne’ebé ita iha no rejime fiskál, rejime legál hafoin iha meadu tinan oin (2020) sira bele hatama sira-nia aplikasaun mai ita, bele individuál no bele mai hanesan parseiru (joint venture)”, dehan Gualdino.
Prezidente ANPM ne’e friza investidór sira mai kandidata mak Timor Leste hala’o avaliasaun hodi hili ida ne’ebé folin boot tuir regra hodi selebra kontratu.
“Ita halo avaliasaun no molok fin du anu tinan oin ita selebra kontratu foun no ita espera ita hetan kontratu foun 18”, nia espera.
Mina no gás iha bloku 18 ne’e, nia estrutura fatuk no basia identifika ona iha estudu sízmiku katak kamada fatuk ne’ebé iha potensialidade boot bele akumula petróleu no gás. Tanba ne’e, TL tenke servisu maka’as halo promosaun liuhusi simeira sira internasionál hodi ema bele mai investe.
Hafoin lansamentu iha simeira ne’e, Timor-Leste rona peritu industriál atu ko’alia poténsia petróleu iha Timór halo oinsá.
“La’ós ita timoroan, maibé ita konvida mós peritu sira husi rai-li’ur husi parte indústria nia, Austrália, Inglaterra sira ne’ebé durante ne’e halo estudu no survey dadus kona-ba potensiál Timor-Leste nian iha tasi-laran no mós iha rai-maran ne’ebé ita rasik halo hodi hatudu ba mundu katak rikusoin saida mak ita iha”, nia dehan.
Gualdino relata tuir planu, aban, simeira ne’e sei foka liu ba negósiu atu halo mós aprezentasaun liuliu ConocoPhillips no TIMOR GAP, EP, Timor Resources no Caltech ne’ebé fornese bens no servisu ba projetu Bayu Undan atu hatudu ba mundu katak Timór bele sai na’in ba atividade petrolífera.
“Ema bele mai investe iha ne’e tanba sira kompañia internasionál ne’ebé sei partilla esperiénsia no koñesimentu ba investimentu ne’ebé durante ne’e sira halo ona iha Timor-Leste atu hatudu ba mundu, Timor-Leste bele sai nasaun ne’ebé di’ak atu halo investimentu iha laran”, nia afirma.
Iha mós painél ba diskusaun ba potensialidade rikusoin hodi provoka atu ema bele mai investe iha Timor-Leste.
Simeira internasionál kona-ba Petróleu no Gás Timor-Leste (“Timor-Leste Oil & Gas Summit 2019”) ne’e Autoridade Nasionál Petróleu Minerál) organiza ho apoiu hosi IN-VR Oil & Gas.
Konferénsia internasionál ida ne’e nu’udar eventu ofisiál indústria hosi petróleu no gás dahuluk iha Timor-Leste no sei sura ho partisipasaun hosi oradór nasionál no internasionál liu 30 no ema partisipante oioin hosi nasaun 16 liu partisipante 250 no empreza hosi setór sira liu 250.
Eventu ida-ne’e nia objetivu prinsipál maka reúne profisionál sira iha setór ne’e no oferese oportunidade ne’ebé boot ba partisipante sira atu kria, dezenvolve no kontinua parseria komersiál foun no parseria sira ne’ebé eziste ona hosi área hotu ba di’ak ema hotu nian.
IN-VR Oil & Gas maka empreza ida ne’ebé ho sede iha Reinu Unidu, ne’ebé harii iha tinan 2016, ho esperiénsia servisu barak tebes ho entidade governamentál sira atu promove sira-nia inisiativa sira iha setór petróleu, enerjia no minerál.
Notísia relevante : Estudu Sízmiku Hatudu Fásil Halo Esplorasaun Mina no Gás iha TL
Jornalista : Florencio Miranda Ximenes
Editora : Maria Auxiliadora
