DILI, 13 outubru 2019 (TATOLI) – Prezidente Liga Futeból Amadora (LFA), Nilton Gusmão, hateten tinan ida-ne’e nia ho ninia estrutura hotu tenke realiza duni kongresu ida, nune’e bele defini fali estrutura foun.
“Kongresu ami ko’alia barak iha reuniaun tanba ne’e tenke realiza duni atu bele defini fali estrutura no lideransa foun ba époka tuir mai,” tenik Nilton iha Estádiu Dili, foin lalais ne’e.
Nia dehan, bainhira iha kongresu, klube hotu maka sei aprezenta kandidatura tanba ne’e nia lakohi atu fó komentáriu kle’an kona-ba nia atu kandidata-aan fali ka lae.
“Iha kongresu ba mak ita haree katak klube sira atu kandidatu ha’u ka lae. Depois maka ita haree. Se sira atu kandidatu ha’u mak ha’u sei fó komentáriu tanba ita ko’alia agora sedu demais”, nia akresenta.
Entretantu, LFA eziste iha 2015 hahú ho estrutura ne’ebé lidera hosi Nilton Gusmão, maibé mandatu ba estrutura-ne’e ramata ona iha 2018.
Maski nune’e, Governu liuhosi Sekretaria Estadu Juventude no Desportu (SEJD) fó tan konfiansa hodi estende tan mandatu ba tinan ida.
Tanba ne’e, époka 2019 nu’udar oportunidade ikus ba Nilton Gusmão ho ninia estrutura.
Karik klube sira fó nafatin konfiansa ba Nilton ho ninia estrutura maka estrutura ne’e sei mantein nafatin no sei laiha figura foun maka lidera fali órgaun refere.
Jornalista: Hortençio Sanchez
Editór: Xisto Freitas
