DILI, 17 outubru 2019 (TATOLI) – Tribunal Rekursu (TR) seidauk simu despaixu ruma husi Tribunal Distritál Dili (TDD) kona-ba kazu eis Komandante Polisia Investigasaun Kriminál, Calisto Gonzaga nian. Tanba ne’e, Prezidente Tribunal Rekursu, Deolindo dos Santos, hateten, kazu ne’e sei pendente hela iha TDD.
“Ha’u hanoin kona ba kazu Calisto Gonzaga nian, ha’u seidauk bele fó ha’u nia opiniaun tanba kazu nee pendente hela, tanba nee ha’u seidauk bele ko’alia buat ida,” tenik Deolindo dos Santos, ohin, ba ajénsia TATOLI iha Tribunal Rekursu, Caicoli, Dili.
Nia hatutan, desizaun Tribunal Distritál Dili (TDD) ne’ebé mak aplika ba arguido Calisto Gonzaga tinan 8 fulan 6 iha primeira instánsia, maibé too oras nee daudaun rekursu ka desizaun ruma seidauk mai iha Tribunal Rekursu.
Hatán kona ba razaun saida mak TDD seidauk haruka ba iha Tribunal Rekursu, nu’udar dirijente la hatane razaun saida, maibé kuandu mai ona mak Tribunal Rekursu sei haree.
Calisto Gonzaga hetan akuzasaun krime abuzu podér no krime sequesto relasiona ho detensaun ilegál ba sujetivu droga nain tolu husi Indonézia iha tinan 2011.
Liu husi leitura akórdaun Tribunal nian iha loron 25 setembru 2015, arguido Calisto Gonzaga, provadu komete krime naun partisipasaun ho sequesto tribunal aplika pena prizaun tinan ualu (8) fulan neen (6) no selu kustu judisiáriu $40.00.
Jornalista : Domingos Piedade Freitas
Editór : Francisco Simões
