DILI, 22 outubru 2019 (TATOLI) –Rezultadu teste médiku fó sai iha loron 16 outubru, foin lalais nee katak, arguido CDJ ne’ebé lori motor atu soke aviaun Sriwijaya Air, sofre mental ho naran skoza agudu.
Notísia Relevante : Ho Motor Atu Soke Aviaun ba Para iha Prizaun Preventiva
Diretór Nasionál Estabelesimentu Prizaun Becora, João Domingos, ohin, informa, arguido ne’e kumpre hela medida koasaun preventiva iha Prizaun Becora no tuir rezultadu hosi teste médiku katak arguido sofre duni moras mental ‘Skoza Agudu’.
Ba jornalista sira iha Tribunal Distritál Dili (TDD), João Domingos, informa, oras ne’e ba kondisaun arguido nia normal fila fali ona, tanba moras ne’ebé arguido sofre ladún grave, hanesan ema bulak seluk.
“Haree liuhosi teste médiku, arguido CDJ ladún grave entaun ami haruka sira hela hamutuk de’it, toba hamutuk no han mós hamutuk, importante ba sira mak kontrola ho di’ak,” João Domingos hateten.
Daudaun ne’e prezu sofre moras mental hamutuk na’in 21 mak kumpre sira nia sentensa iha Prizaun Becora no iha nain rua ka tolu mak nia kondisaun atu rekoopera total ona.
Jornalista : Domingos Piedade Freitas
Editór : Francisco Simões
