LIQUIÇÁ, 02 novembru 2019 (TATOLI) – Uma lisan sia hosi Aldeia Hecar no Lisa-Ico, Suku Dato, Postu Administrativu Liquiçá, Munisípiu Liquiçá, selebra loron finadu hamutuk.
Xefe Aldeia Lisa-Ico, Mateus dos Santos Alves, hateten uma lisan sia ne’e selebra finadu hamutuk dezde uluk.
“Kari ai-funan hamutuk ne’e dezde bei’ala sira, uma-mane no mane-foun hosi uma lisan sia ne’e hamutuk. Ne’e hatudu katak fraternidade hosi jerasaun ba jerasaun kontinua hametin kultura unidade ida-ne’e”, tenik Mateus dos Santos ba Agência Tatoli, sábadu ne’e.
Uma lisan sia ne’e, kompostu hosi uma lisan Bere Besi Laukala Soa Kabu Roda, Bere Besi Laukala Soa Lagana, Bere Besi Laukala Majór, Tahu Ma’u Besiolo Soa Ba, Taha Ma’u Beisolo Soa Klau, Asu Leki Maupelu, Meta Bere Mau Kdesa, Koli Bere Mausaka, no Meta Bere Maukdesa Haulema.
Nia haktuir, kada tinan laiha ema ida maka ba soe mesak ai-funan iha rate tanba tenke hein hotu iha uma lisan sia ne’e hafoin maka bele kari ai-funan.
Aldeia Lisa-Ico iha xefe família hamutuk na’in-54 no totál populasaun 270.
Parte seluk, Xefe Aldeia Hekar, Marito de Carvalho, hateten kada tinan kari ai-funan iha uma lisan nu’udar parte ida atu hatudu unidade.
“Ne’e hanesan kultura unidade ida-ne’ebé kontinua ba oin, ida-idak bele iha ninia lisan rasik maibé lori ai-funan ba rate ba jerasaun uma lisan sia ne’e sai no reza hamutuk iha rate hafoin kari ai-funan hamutuk”, nia dehan.
Aldeia Hekar iha xefe família hamutuk na’in-63 no totál populasaun 345.
Entretantu Reprezentante Lia Na’in hosi Uma Lisan Sia, Ximenes Vidigal, orgullu ho jerasaun uma lisan ne’e tanba kontinua valoriza no hametin liután unidade.
“Ha’u kontente tanba uma lisan sia ne’e banati nafatin unidade dezde bei’ala rai hela. Ami sei kontinua unidade ne’e ba oin, tanba unidade ida-ne’e mós hatudu iha sentidu hosi finadu ne’e”, nia subliña.
Akresenta tan, iha fatin seluk ida-idak ba kari ai-funan, maibé úniku uma lisan sia ne’e maka selebra finadu hamutuk.
Tuir observasaun jornalista Agência Tatoli iha terrenu, jerasaun hosi uma lisan sia ne’e hamutuk na’in-500 resin maka partisipa iha atividade finadu ne’e.
Jornalista : Evaristo Soares Martins
Editór: Xisto Freitas
