DILI, 08 novembru 2019 (TATOLI) – Primeiru-Ministru (PM), Taur Matan Ruak, konvoka reuniaun estraordinária ho Konsellu Interministeriál ba Jestaun Apoiu Vítima Dezastre Naturál, hodi deskute kona-ba asaun Governu ba vítima afetadu dezastre naturál.
Ministra Finansa interina, Sara Lobo Brites, informa rezultadu hosi enkontru pozitivu tebes tanba iha tempu badak ministériu hirak ne’ebé liga direitamente ho prosesu komesa hahú ona distribui sasan ba familia vitima afeitadu.
“Ohin Primeiru-Ministru mak prezide reuniaun ida ho ministru membru sira ho objetivu atu aselera prosesu atu apoiu ba ita nia komunidade sira ne’ebé mak afetadu ba dezastre naturál ne’ebé foin lalais akontese”, tenik Sara Lobo iha Palásiu Governu, sesta ne’e.
Orsamentu 2019 ne’ebé Governu prevee ba dezastre naturál iha Ministériu Solidariedade no Inkluzaun (MSSI) la sufisiente, tanba ne’e liuhosi reuniaun estraordináriu ne’e, Xefe Governu orienta Ministra Finansa atu hasai fundu kontijénsia hodi fasilita materiál ba vítima afetadu.
Nune’e, ministériu relevante hanesan Ministériu Administrasaun Estatal, Ministériu Solidariedade Sosiál no Inkluzaun no Sekretaria Estadu Protesaun Sivíl sei kolabora hamutuk hodi bele aselera prosesu.
“Kona-ba orsamentu, ita iha orsamentu ne’ebé mak alokadu iha Ministeriu Solidaridade Sosial no Inkluzaun no tinan-tinan ita sempre tau orsamentu atu bele atende dezastre naturál, maibé ida-ne’e akontese ho eskala boot no osan alokadu iha ministériu la sufisiente”, nia akresenta.
“Oras ne’e daudaun ami seidauk iha montante loloos presiza hira. Maibé semana oin, tarde segunda ita bele iha ona informasaun atu haree oinsá maka bele fó apoiu ba ita nia komunidade sira,” nia esplika.
Nia haktuir, bazeia ba dadus hosi Ministériu Administrasaun Estatál, ajudu atu oferese ba munisípiu haat afeitadu hanesan, Ermera, Aileu, Bobonaro no Baucau.
“Ajudu sira ne’e, atu atende ba munísipiu haat ne’e hotu kedan. Fó apoiu ba materiál konstrusaun uma tanba uma balun hetan estragu hotu, maibé balun anin foti de’it kalen mak naksobu. Entaun buat sira ne’e hotu sei iha ninia kritériu ne’ebé maka defini kona-ba vítima sira ne’ebé maka merese fó apoiu”, governante ne’e salienta.
Iha reuniaun ne’e, partisipa hosi, Ministra Solidaridade Soasial no Inkluzaun Armanda Berta, Ministru Obra Públika Salvador Eugénio Soares Dos Reis Pires, Ministru Agrikultura no Peska Joaquim José Gusmão dos Reis Martins, Ministra Finansa interina Sara Lobo Brites, Ministru Administrasaun Estatal Abílio José Caetano, Ministru Negósiu Estranjeiru no Kooperasaun Dionísio Babo Soares, Vise-Ministra Kuidadu Saúde Primária Elia dos Reis Amaral, Ministru Transaporte no komunikasaun José Agostinho da Silva, Sekretáriu Estadu Protesaun Sivíl Alexandrino de Araújo, Diretor Sentru Integradu ba Jestaun Krize Brigadeiru Jenerál, João Miranda Aluk.
Jornalista: Hortençio Sanchez
Editór: Xisto Freitas
