DILI, 28 novembru 2019 (TATOLI) – Reitór Universidade Nasionál Timor Lorosa’e (UNTL), Francisco Miguel Martins hateten, universidade iha papel bo’ot atu prepara joven sira hodi hetan sira-nia futuru. Tanba ne’e kualidade joven sira nian depende ba investimentu ne’ebé mai husi Governu atu labele ta´uk investe osan ba UNTL.
Kuandu laiha ema ida mak prepara no kuida joven sira, futuru ba rai ida ne’e mós laiha tanba Ne’e UNTL iha ninia planu institusionál no akadémika atu kontinua dezenvolve aan ho didi´ak no loloos hodi sai estudante ida kualidade
“Ita iha planu prioridade ba futuru nian atu bele eleva liután kualidade institusionál no dezenvolvimentu kapasitasaun estudante sira nian. Maibe, osan laiha mós ita sei labele halo buat ida,” konsidera Reitór Francisco Miguel Martins iha entrevista ho Ajénsia TATOLI iha kampus UNTL, kinta (28/11/2019).
Planu sira ne’e, tenik Francisco katak sira trata tuir nesesidade ne’ebé iha atu nune’e bele aselera planu dezenvolvimentu institusional no akadémika nian. Tanba joven sira mak futuru ba nasaun ne’e. Kualidade iha rekursu umanu la mai husi promesa maibe mai husi buat ne’ebé realidade. Ho nune’e UNTL presiza tan apoiu Governu nian atu tau osan ba Instituisaun Públika ne’e hodi bele dezenvolve ninia aan.
Nia dehan UNTL simu kna’ar ho responsalblidade tomak atu prepara juventude sira hodi apoiu governu iha fituru mai. “Kuandu joven laiha kualifikasaun oinsá atu kompete iha prosesu konstrusaun estadu ida ne’e. Tan ne’e UNTL garante katak governu kuandu la ta´uk atu investe iha instituisaun ne’e, sei fo rezultadu di´ak liután ba nasaun ne’e,” konsidera akadémiku ne´e
Jornalista : Tomé Amado
Editór : Rafy Belo
