DILI, 06 dezembru 2020 (TATOLI) – Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, hateten kompañia Telkomcel hahú dezenvolve ona aplikasaun fa’an billete Nakroma liuhusi sistema online.
“Ita tenta ona ho Telkomcel ne’ebé hahú ona dezenvolve aplikasaun mobile fa’an billete ró Nakroma nia liuhusi online”, Prezidente APORTIL ne’e ba TATOLI iha knaar fatin Portu Dili, ohin.
Nia dehan sistema aplikasaun ne’e bainhira dezenvolve hotu bele halo implementasaun ona bainhira ró Nakroma fila husi Surabaya-Indonézia.
“Ita-nia sistema ne’e Telkomcel halo nia aplikasi de’it hodi ema hotu bele download iha telefone atu hakarak sosa tikete bele tama aplikasaun ne’e hodi sosa liuhusi online”, katak.
Prezidente APORTIL ne’e dehan kompañia telekomunikasaun Telkomcel mak halo aplikasaun ne’e tanba sira fasil halo sistema aplikasaun no iha kooperasaun ho satélite Venus nian.
Notísia relevante : APORTIL sei Fa’an Billete Nakroma Liuhusi Online
“Telkomcel mak dezenvolve sistema aplikasi ne’e, maibé la’ós sistema aplikasi de’it, maibé dijitaliza mós akompaña ró nakroma halo operasaun no tula sasán saida de’it iha ró laran”, afirma.
Hatán ba implementasaun sistema online ne’e, Flávio dehan ró Nakroma fila mai bele hahú halo implementasaun iha fulan oin (fevereiru), maibé presiza mós halo sosializasaun atu públiku bele hatene.
Maibé, Prezidente APORTIL ne’e dehan sistema manuál mós sei kontinua uza atu fasilita mós populasaun balun ne’ebé sidauk bele utiliza sistema online.
“Sistema ne’e ita bele implementa, maski ita ladún iha kapasidade ita presiza halo implementasaun faze pur faze to’o ita-nia públiku hatene hotu”, katak.
Razaun uza sistema online atubele fasilita no kria kondisaun hodi ema labele mai forma iha Portu hodi sosa tíkete.
“Ita tenta etapa aplikasaun no kontinua sosializa atu ita bele fasilita ema ne’ebé hakarak halo viajen bá Oe-Cusse no Atauro”, hatenik.
APORTIL hakarak halo preparasaun ba jestaun liuliu fa’an billete tanba Governu mós iha planu atu sosa tan ró Nakroma II.
Entretantu, Flávio salienta Ministru Transporte no Komunikasaun (MTK) fó ona orientasaun ba APORTIL atu promove timoroan sira sai tripulante ba ró Nakroma iha tinan ne’e.
Tanba daudaun kapitaun ho tripulante hamutuk 16 ne’e kuaze sidadaun Indonézia, ne’ebé timoroan na’in-12 komesa hala’o jestaun mós ba ró Nakroma.
Politikamente Governu Timor-Leste liuhusi MTK iha ona akordu (MoU, sigla inglés) ho Ministériu Transporte Indonézia atu implementa polítika formasaun no kapasitasaun ba timoroan sira, mas depende ba Orsamentu Jerál Estadu 2020.
Notísia relevante : Tenke Promove Timoroan Sai Tripulante ba Nakroma
Jornalista : Florencio Miranda Ximenes
Editora : Maria Auxiliadora
