DILI, 09 janeiru 2020 (TATOLI) – Tribunal Distritál Dili (TDD), kinta (09/01/2020), hala’o julgamentu ba Funsionáriu Públiku ho inisiál SS husi Ministériu Obras Públika, Transporte no Komunikasaun (MOPTK) tanba deskonfia komete krime falsifikasaun dokumentu Estadu.
Tuir akuzasaun husi Ministériu Públiku (MP) ho númeru prosesu 0054/19.PNSIK, katak, arguido SS servisu iha MOPTK dezde tinan 2009, iha area servisu limpeza too 2011 iha area finansas husi gabinete diretór jerál.
Arguido nia servisu hanesan halo atendimentu profile kompañia nian no mós servisu atendimentu karta tama no sai iha gabinete DG nian.
Iha kazu nee arguido sempre falsifika dokumentu, bainhira kompañia ida hatama dokumentu profile, no sempre husu osan ba kada kompañia tenke selu $10.00 too $50.00.
Kompañia sira ne’ebé selu ba arguido mak hanesan Kompañia Nunu Wai ho montante U$ 350.00 ho objetivu atu fasilita komunikasaun kona-ba DG nia despaixu no fasilita kopia ba kompañia nia despaxu ministru no DG nian.
MP nia akuzasaun ne’e deskreve katak, arguido aproveita nia funsaun ne’ebé fó ba nia halo abuzu hodi falsifika kopia despaxu ba ministru no DG ba diresaun Estrada hodi fó ba kompañia refere hodi simu osan ne’ebé kada kompañia ida sei selu $10.00 too $ 50.00. Total osan sira ne’ebé arguido simu $ 850.00.
Ho hahalok nee Ministériu Públiku uza nia kompeténsia akuza arguido SS ba krime falsifikasaun dokumentu Públiku no krime korrupsaun pasiva ba aktu ilísitu ne’ebé previstu no púnidu tuir artigu 267 númeru 1 husi kódigu Penal Timor-Leste nian.
Depois Tribunal lee sai akuzasaun, Tribunal koletivu nee seidauk rona deklarasaun ho onestu husi arguido nian, tanba iha provas balu mak Ministériu Públiku atu junta iha akuzasaun.
Iha akuzasaun laran antes Ministériu Públiku akuza ho krime seluk hanesan burla simples, maibé krime nee la konsta inklui vítima sira nia naran ou junta kompañia nia naran, maibé apenas de’it konsta krime korrupsaun pasiva no falsifikasaun.
Tribunal deside no husu ba Ministériu Públiku atu monta dokumentu seluk refere liu ba vítima nia naran ba krime Burla.
Aleinde nee, Tribunal mós husu atu nomea defeza nain ida tan, tanba haree ba interese pesoál, katak aleinde defensór, arguido mós tenke hili advogadu ou mantein defensór públiku.
Husi razaun sira nee, tribunal deside halo adiamentu prosesu julgamentu ba loron 8 juñu 2020, tuku 9:00 dadeer.
Audiénsia nee prezide husi juis koletivu, Antonino Helder do Carmo, Sribuana da Costa no Albertina Neves.
Enkuantu, parte Ministériu Públiku reprezenta prokuradór, Rogério Viegas, no arguido hetan asisténsia legal hanesan provizoriamente husi Defensór Públiku Fernando Carvalho.
Jornalista : Domingos Piedade Freitas
Editór : Francisco Simões
