DILI, 09 janeiru 2020 (TATOLI) – Movimentu Asaun Ekonomia Komunitária (MAEKOM) hatama ona produtu frangu hamutuk 140 iha Loja Agrikultór Fatuhada, Dili, ho folin razoavel.
Prezidente MAEKOM, Rui Castro, hateten produsaun frangu hahú iha Dezembru 2019 domina ona iha merkadu ho porsentu 20.
“Ami ofisialmente hatama produtu frangu mai Loja Agrikultór iha Fatuhada. Antes ne’e, ema balu hatama maibé ninia presu bele dehan boot uitoan, entaun ami MAEKOM hakarak mai hatama ho folin dólar neen kada manu ida, no ba oin sei tun ba beibeik tanba produsaun mós makaas tan de’it”, Prezidente MAEKOM informa ba TATOLI hafoin akompaña ekipa MAEKOM lori produtu ne’e ba Loja Agrikultór, ohin.
Emprezariu timoroan ne’e otimista katak, bá oin produtu MAEKOM hanesan broiler sei domina iha merkadu to’o porsentu 40.
“Iha dezembru tinan kotuk, produtu manu (frangu) hamutuk rihun 100 (kilo rihun 200) tama iha merkadu, tanba ne’e maka iha Natál no tinan foun estoke broiler barak liu iha fatin hothotu ho folin di’ak”, afirma.
Rui Castro kompromete katak, aléinde hatama frangu, sei hatama mós produtu seluk hanesan manu-tolun no na’an manu kiukai (puyuh), na’an manu-rade no produtu agrikultura sira seluk.
“Ami foku hakarak haboot Loja Agrikultura, ami sei iha posibilidade loke dalan katak Loja Agrikultura bele sai distribuidór ba iha produtu MAEKOM no ami sei konsentra mai iha loja ne’e no ami sei fó folin ne’ebé baratu”.
MAEKOM garante presu ne’ebé razoavel ba kompradór sira no oferese ona kilógrama rua (2kg) ho $6 de’it ($3/kg) no ne’e barratu liu kompara ho frangu importadu kilógrama ida (1kg) ho folin $4.
Jerente Loja Agrikultór, Jacinto Pereira, dehan produtu frangu haki’ak iha Timór, tanba ne’e konsidera hanesan produtu lokál.
“Loja Agrikultór ne’e nakloke ba agrikultór hotu, ne’ebé sasán saida de’it bele mai hatama hodi fa’an. Antes ne’e, iha timoroan balu hatama ona”, Jacinto dehan.
Nia afirma, Loja Agrikultór prontu simu produtu lokál hosi to’os-na’in hodi haburas liután povu agrikultór hodi hasa’e rendimentu família.
Entretantu ho investimentu iha broiler benefisia ona timoroan kompostu hosi na’in ba luhan 80-resin, servisu iha luhan 200-resin, sai fa’an na’in 480-resin.
Notísia relevante : MAEKOM Garante Broiler sei Domina Merkadu Nasionál
Jornalista : Antónia Gusmão
Editora : Maria Auxiliadora
