DILI, 21 janeiru 2020 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares informa, tuir planu iha loron 2-3 fevereiru 2020, Ministru Negósiu Entranjeiru no Konselleiru do Estadu Xina, Wang Yi, sei vizita Timor-Leste.
“Ministru Negósiu Estranjeiru Xina nian, ne’e pais ida bo’ot tebe-tebes, nia la vizita rai arbiru, maibé mai atu vizita Timor-Leste. Katak, fó importansia ba ita-nia rain, ita-nia politika, ita-nia lider sira, no ita-nia dezenvolvimentu,” dehan Ministru Negósiu Estranjeiru no Kooperasaun (MNEK), Dionísio da Costa Babo Soares, ba jornalista sira hafoin ramata enkontru Konsellu Ministru iha Palácio do Governo, ohin.
“Nia hatutan, Timor-Leste mezmu ho situasaun polítika ida hanesan ne’e, ita tenke hatudu katak ita bele sai uma na’in di’ak para simu vizitór ida, bainaka ida ne’ebé mai husi nasaun boot liu iha mundu, em termos de tamañu ho populasaun balun,” diplomata timoroan ne’e dehan.
Eis-Ministru Justisa iha Sestu Governu Konstitusionál ne’e hateten, Ministru Negósiu Estranjeiru Xina mai iha ne’e sei buka atu hasoru no halo audiénsia ho Primeiru-Ministru no Prezidente Repúblika.
“Ami sei tenta ho entidade balun ne’ebé mak señor ne’e hakarak hasoru. Ami sei ko’alia programa balun no sei tenta atu koordena atu asina apoiu balun ne’ebé sira fó. Tanba, ita mós fó apoiu ba sira iha nível multilateral ni’an, liuliu ita hakarak serbisu hamutuk iha área saúde ninian liuliu iha rekursu umanus,” nia hateten.
Nia reforsa, nasaun boot Xina presiza timoroan sira atu ba hala’o sira-nia estudu ka eskola iha rai boot Xina tanba Governu Xina fo apoiu hodi oferese bolsu estudu ba timoroan sira.
“Sira fó bolsa de estudu para iha futuru timoroan sira bele ba eskola liután iha ne’eba,” nia dehan.
Jornalista : Nelia Fernandes
Editór : Rafy Belo
