DILI, 27 janeiru 2020 (TATOLI) – Defeza Fernando da Costa, ne’ebé fó asisténsia legal ba arguido CBM, ohin, hatama rekursu ba Tribunal Rekursu liuhusi Tribunal Distritál Dili (TDD).
Notísia Relevante : Tribunal Aplika Prizaun Preventiva ba Timoroan Simu Droga husi Nijéria
Arguido CBM kumpre hela prizaun preventiva ba kazu simu droga sabu-sabu ne’ebé importa husi Nijéria mai Timor-Leste liuhusi Aeroportu Internasionál Prezidente Nicolau Lobato, foin lalais ne’e.
“Ha’u hatama rekursu ba Tribunal Rekursu liuliu ba desizaun primeira instánsia nian tanba haree de’it ba iha tipu krime nian no modula penal ne’ebé mak mais superior tinan tolu,” informa, Fernando da Costa, ba Ajénsia TATOLI, bainhira remata hatama rekursu iha TDD.
Nia konsidera katak rekursu ne’e haree mós ba desizaun TDD ne’ebé la haree ba rekizitu jerál ne’ebé mak prienxe iha artigu 186 kódigu penal Timor-Leste alínea 2 katak lala’ok kriminál depende husi keixa.
Hatán kona-ba prazu atu Tribunal Rekursu fó fali resposta, nia dehan, ne’e depende fila fali Tribunal Rekursu no bele to’o fulan ida.
Notísia Relevante : Polisia Deskobre Droga Nijéria iha Sekuénsia ho Kazu Kazál Timoroan
Jornalista : Domingos Piedade Freitas
Editór : Francisco Simões
