DILI, 01 fevereiru 2020 (TATOLI) – Governu Xina fó ona autorizasaun ba Governu Timor-Leste atu evakua bolseiru timoroan na’in-17 ne’ebé izola an iha Wuhan, Provínsia Hubei.
“Konfrome informasaun ne’ebé mai husi ita-nia Embaixada Timor-Leste iha Xina katak iha posibilidade tempu besik evakua ona ami iha Wuhan tanba ita-nia Governu negosia ona Governu Xina no hetan ona autorizasaun atubele halo evakuasaun”, bolseiru Nicodino da Cruz ne’ebé foti kursu mestradu iha área Civil Engineering iha China University of Geosciences-Wuhan, ba Ajénsia TATOLI via mídia sosiál, ohin.
Nicodino da Cruz dehan daudaun ne’e bolseiru sira hahú prepara ona hodi hein informasaun husi Embaixada Timor-Leste no Governu Xina ba prosesu evakuasaun.
“Ami hein de’it informasaun ba evakuasaun, tanba ita-nia Governu husu ona Governu Xina ne’ebé sira fó ona autorizasaun no ita negosia ona nasaun viziña sira atu fasilita ami-nia viajen”, katak.
Nune’e, nia dehan kontente uitoan tanba iha ona posibilidade boot atu evakua, maibé seidauk hatene informasaun klara bainhira evakua ne’e bá liu Timór ka muda de’it ba sidade seluk no sira prontu atu koopera.
Entretantu, Governu Timor-Leste liuhusi embaixada iha Xina fó ona apoia emerjénsia ba bolseiru timoroan na’in-17 iha Wuhan ho osan $850 atubele hola ai-han ruma iha tersa (28/01/2020).
Notísia relevante : Embaixada Timór iha Xina Apoia ona Orsamentu ba Bolseiru iha Wuhan
Estudante bolseiru sira iha sidade Wuhan ne’e estudu iha universidade hanesan, China University of Geosciences (Wuhan), China Central Normal University, Huazhong University of Science and Technology, Wuhan University, Wuhan University of Science and Technology, Hubei University no Zhongnan University of Law.
Konsellu Ministru mós aprova ona orsamentu millaun $1,5 ba akizisaun materiál scan kona-ba deteta moras no prevensaun sokorru dahuluk ba evakuasaun bolseiru timoroan na’in-17.
Notísia relevante : KM Aprova Osan $1.5 Millaun Atu Prevene Virus Corona
Jornalista : Florencio Miranda Ximenes
Editora : Maria Auxiliadora
