DILI, 06 janeiru 2020 (TATOLI) – Tribunál Distritál Dili (TDD) liuhusi audiénsia julgamentu, ohin, kontinua rona deklarasaun arguidu ho inisiál AS bá kazu funsionáriu husi Ministériu Edukasaun (ME) na’in tolu komete krime Administrasaun Danoza ho krime Pekulatu.
Tribunál Distritál Dili (TDD), ohin, kontinua halo julgamentu ba funsionáriu Ministériu Edukasaun (ME) na’in tolu, nu’udar arguidu ba krime administrasaun danoza no pekulatu.
Notísia Relevante : Deskonfia, Funsionáriu ME Na’in Tolu Komete Krime Pekulatu
“Ha’u rekoñese duni katak momentu ne’ebá hanesan diretór, maibé kona-bá osan nia parte la iha koñesimentu tanba arguida DF mak kaer osan hirak ne’e”, deklara arguida AS iha tribunál.
Arguidu AS iha nia deklarasaun kontradís ho arguida DF nia deklarasaun, tanba ne’e defeza husu bá tribunál hodi notifika fali defeza seluk hodi atende arguida DF nian. Kona-bá ne’e, Ministériu Públiku laiha opozisaun husu tribunál notifika defeza ida.
TDD adia fali audiénsia julgamentu ne’e ba loron 18 fevereiru 2020, tuku 9:00 hodi kontinua rona deklarasaun arguidu sira nian.
Prosesu legál ne’e prezide husi juis João Ribeiro, Maria Solana, Maria Modesta, ministériu públiku reprezenta husi prokuradór Jacinto Babo, substitui husi Luis Hernany Rangel no arguidu sira hetan asisténsia legál husi defensór públiku inklui mós advogadu privadu Pedro Aparicio.
Jornalista : Domingos Piedade Freitas
Editór : Francisco Simões
