DILI, 13 fevereiru 2020 (TATOLI) – Tribunal Distritál Dili (TDD), ohin, hala’o audiénsia julgamentu ba kazu pekulatu de uzu ne’ebé komete husi arguido DA nu’udar funsionáriu públiku iha Ministériu Edukasaun.
Arguido DA ba hatán iha Tribunal tanba ho konsiénsia autoriza nia alin utiliza veíkulu Estadu (motorizada) hodi lori ba manu futu iha area Kuluhun, Dili.
Tuir akuzasaun husi Ministériu Públiku katak, iha 02 Juñu 2019, arguido DA autoriza nia alin FD la’ós funsionáriu públiku utiliza motorizada ho marka Mega Pro ho nia númeru matrikula 94 77. G husi uma atu ba manu futu fatin, Kuluhun, Dili. Maibé, to’o iha kruzamentu Kuluhun nian, ekipa operasaun konjunta, kompostu husi Polisia Nasional Timor-Leste (PNTL), Komisaun Anti Korrupsaun (CAC), Diresaun Nasional Transporte no Terrestre (DNTT) ho Diresaun Nasional Patrimóniu Estadu (DNTE), halo pasa revista no apreensaun ba veíkulu Estadu ne’ebé halo movimentu iha Sábadu ho Domingo no loron ferias nasionál.
Iha pasa revista ne’e, identifika katak, arguido FD nu’udar alin husi arguido DA la iha autorizasaun husi autoridade ME kona-ba utilizasaun veíkulu iha tempu fim da semana, mezmu hatene hela katak veíkulu ne’e Estadu nian.
Arguido mós hatene hela katak, hahalok ou konduta ne’ebé maka nia halo proibidu tuir lei penal. Tanba ne’e arguido, hanesan autoria material ba pratika krime Pekulatu ba uzu, iha artigu 296 husi kódigu Penal, no krime kondusaun sem karta artigu 207 husi kódigu penal.
Hatán ba akuzasaun ne’e arguido FD no MD deklara ba tribunal katak, faktu sira ne’e loos hotu.
Iha legasaun final ministériu públiku rekore ba tribunal atu aplika pena úniku mak pena prizaun tinan rua, suspende ba tinan haat no mós husu ba tribunál atu aplika pena assessorial ba arguido FD durante fulan tolu la bele lori karreta ka motor iha Estrada públika.
Parte defeza husu ba tribunal atu konsidera arguido sira nia deklarasaun tanba sira mós konfesa imparsiál ba tribunal.
Tanba ne’e defeza husu ba tribunal atu foti desizaun ne’ebé justu ba arguido sira.
Rona tiha husi parte sira ne’e, tribunal deside adia julgamentu ne’e ba fali loron seluk hodi rona desizaun final.
Audiénsia julgamentu ne’e preside husi juis singular, Ivan Suritay, Ministériu Públiku reprezenta husi Prokuradora, Lidia Soares, arguida hetan asisténsia legal husi defensór públiku, Laura Valente Lay.
Jornalista : Domingos Piedade Freitas
Editór : Francisco Simões
